Respublikada mäğärif xezmätkärläreneñ avgust konferensiäse inde tämamlansa da, uqıtuçılarnıñ kiñäşmäläre äle däwam itä. Şul isäptän, virtual’ dönyada da. 23 avgustta Bötenrusiä avgust internet-pedsovetı eşli başladı. Rusiä mäğärif xezmätkärläreneñ virtual’ kiñäşmäse başqalardan ayırmalı bularaq 1-2 kön genä tügel, ä 23 avgusttan 31nä qädär däwam itä. Uqıtuçılarnıñ mondıy fikerläşü ısulı 2000 yıldan başlanıp kitte. Xäyer, ul yıllarda internet konferensiädä qatnaşuçılarnıñ sanı dä bik az – nibarı 198 keşe bulğan. Läkin inde 2003 yılda kiñäşmäneñ eşendä 4 meñnän artıq qullanuçı qatnaştı. Bu yulı isä alarnıñ sanı tağı kübräk bulır, dip kötelä. Kiñäşmäneñ äle ikençe genä eş köne, ä terkälüçelärneñ sanı inde 2 meñ yarımğa citep kilä. Uzğan virtual’ avgust kiñäşmäse tatarstanlılarnıñ iğtibarın ällä ni cälep itmägän ide. Anıñ qarawı, Başqortstan uqıtuçıları 502 qatnaşuçısı belän iñ aktiv eşlägän töbäklärneñ berse bulıp terkälde. Bu yulı isä Tatarstannan da älege cıyılışnıñ eşendä qatnaşırğa teläwçelär küp. Bügenge köndä genä alar inde 100dän artıq keşe. Bu konferensiädä bezdän kemnär fiker alışa soñ? Şunısı qızıq, mäğärif ölkäsendäge problemalar häm alarnıñ çişeleş yulları xaqında kübräk mäktäp citäkçeläre – direktorlar häm zavuçlar kiñäşläşergä teli ikän. Terkälüçelär arasında alarnıñ sanı iñ zurısı. Ata-analar, uquçılar da çittä qalmağan. Ğomumän, kompyuterı häm internet çeltärenä çığu mömkinlege bulğan bar telägän keşe älege pedsovetnıñ eşendä qatnaşa ala. Monıñ öçen www.pedsovet.alledu.ru adresı buyınça wirtual’ kiñäşmäneñ bitenä genä kerergä kiräk.
Respublikanıñ Mäğärif ministrlığında da Bötenrusiä avgust internet-kiñäşmäse belän qızıqsınalar. Mäsälän, ğomumi häm urta belem bülege citäkçese Andrey Nekrasov süzlärenä qarağanda, virtual’ cıyılışta fiker alışu, täcribä urtaqlaşu belän ul ğına tügel, ä anıñ bülegeneñ bar diärlek xezmätkärläre şöğellänä. Bezne ayıruça qızıqsındırğan temalarğa kilgändä isä, bu profille uqıtu, çönki bezneñ respublika älege uqıtu buyınça eksperimentta qatnaşa. Şulay uq Berdäm däwlät imtixannarına bäyle qayber sorawlar da bik qızıqlı häm kiräk. Ğomumän, bar Rusiä töbäklärennän täqdim itelgän täcribä ul bezneñ öçen bik qızıq. Här fän buyınça ayırım mäs’älälär tikşerü bara – bu da bik möhim. Citmäsä, älege kiñäşläşü Rusiäneñ Fän häm mäğärif ministrlığı, alarnıñ belgeçläre belän bergälektä bara, di Andrey Nekrasov.
Çınlap ta, internet pedsovetta bik küp möhim temalarnıñ kütärelä. Monda ayırım fännärne uqıtuğa bağışlanğan temalardan tış Berdäm däwlät imtixannarı, ata-analar, mäktäp psixologları, citäkçeläre öçen forumnar eşli, bügenge mäğärif ölkäsendäge iñ aktual’ temalarğa bilgele ğalimnär qatnaşlığında on-line rejimda tügäräk östäl utırışları uza, professional’, maxsus belem birü mäs’äläläre tikşerelä.
Şunısı ayanıç, Tatarstannan terkälüçelär isemlegennän kürengänçä, mäğärif problemaların tikşerüdä ğadi uqıtuçılar ällä ni qatnaşmıy. Ä bit respublikada här mäktäpkä kompyuter birelde, anı İnternetqa totaştıru mömkinlekläre dä buldırıldı. Läkin yış qına alar qullanılmıy. Bolay bulğaç, respublika kiñäşmäsendä genä mäğärif ölkäsenä innovatsion texnologiälärne kertü kiräklege turında söyläşep utırunıñ faydası bulırmı ikän?
Gölnaz İlgizär
