Respublikada urıp-cıyu eşläre däwam itä. Awıl xucalığı ministrlığı mäğlümätlärenä qarağanda, Tatarstanda bügenge köngä 75 protsenttan artıq cirdän uñış inde cıyıp urılğan. Barlığı älege mäydannan 3 millionnan artıq tonna boday alınğan. Uñış urtaça gektardan 27 sentnernı täşkil itä. Respublikanıñ Tatneft’ berläşmäse dä plannı arttırıp eşli. Bıyıl anda neft’ne uzğan yıl belän çağıştırğanda 0,3 protsentqa kübräk tabılğan. Dimäk, şirkätneñ keremnäre, ul tülägän salımnıñ küläme dä arta. 2004 yılda Tatneft’ 50 milliard sum salım tülär, dip kötelä. Läkin Tatarstan byudjetına älege aqçanıñ nibarı 19 protsentı ğına qalaçaq. 50 milliardnıñ 81 protsent isä Mäskäwgä, federal’ qaznağa kitäçäk.
Qazanğa sişämbe könne Belarus’ respublikası wäkilläre kilde. Monda alar Tatarstannıñ sänäğät şirkätläre citäkçeläre belän oçraşular ütkärälär, söyläşülär alıp baralar. İkeyaqlı xezmättäşlekne arttıru niätennän sentäber urtalarında Qazanğa Belarus’ respublikasınıñ premyer-ministrı Sergey Sidorskiy da kilergä tieş. Ä 27 avgusttan Tatarstanda Germaniä respublikası könnäre uzaçaq.
Qazanda 30 avgustqa – respublika häm şähär könenä äzerlek eşläre tämamlanıp kilä. İnde bu könnärendäge çaralar isemlege dä dönya kürde. Şulay itep, bäyrämdä qatnaşırğa teläwçelär qayda qayçan barasın bilgeläp quya ala. 30 avgustta Qazanda uza torğan çaralarda qatnaşa almağan keşelär dä bäyrämne kürä almıybız, dip aptıramasın. Çönki 30ında ütkärelä torğan tamaşalarnı turıdan-turı internet aşa qarap barırğa mömkin bulaçaq. Tatmedia agentlığı xäbär itüençä, bu könne alarnıñ säxifälärendä irtänge säğät 10nan kiçke 11nçe yartığa qädär bar telägän keşe bäyräm çaraların küzätä alaçaq. İnternet-translyatsiä Kamal teatrı yanındağı mäydançıqtan, Bolaq häm Bauman uramnarınnan, Üzäk stadiondağı tamaşadan oyıştırılaçaq. Tatarstan-Yaña ğasır teleradiokompaniäse dä bäyräm itä bu könnärdä.
26 avgust älege telekompaniäneñ berençe märtäbä efirğa çıqqanına 2 yıl tula. Ä telekompaniäneñ Novosti programması baş möxärrire Rezeda Makueva şuşı könnärdä genä Tatarstan Däwlät Şurasınıñ matbuğat üzäge citäkçese itep bilgelände.
Gölnaz İlgizär
