Bu atnada “Tatnet yoldızları” bäygeseneñ näticäläre bilgele buldı.
Häm barlıq fiker alışular, bäxäslär şul “Tatnet yoldızı” tiräsendä bardı. Ciñüçelär isemlegenä kilgändä, bez sezne alarnıñ qayberläre belän tınıştırırğa buldıq.
“Tatarstan respublikasınıñ iñ yaxşı bite” häm “Tatarlarnıñ mädäniäte, etnografiäse häm tarixı” buyınça iñ yaxşı saytı dip ike nominatsiädä dä ber ük säxifä - “Qazannıñ 1000 yıllıq yubileena” bağışlanğan saytı bilgelänep berençe urınnı aldı, “İnternetta iñ yaxşı ğammäwi mäğlümat çarası” dip bäya birüçelär “Tatarstan” jurnalın tapqan, “Tatar cämğiäte” (diasporası) nominatsiäse buyınça berençelekne “Bötendönya tatar kongressı Başqarma komitetı”, ikençe urınnı “Perm tatarları. Barda rayonı”, öçençe urınnı “Mäskäw tatar studentları cämğiäte” saytı yaulağan. “Tatar muzıkası” turındağı iñ yaxşı sayt dip Avstraliädä yäşäwçe cırçı Zulya Kamalovanıñ säxifäse bilgelängän.
“İñ yaxşı korporativ” sayt dip “Barısı da muzıkantlar öçen” digän muzona.ru bite, ä “İñ yaxşı üzeşçän säxifä” nominatsiäsendä “Tatar cäwhärläre” bite berençelekne yaulağan. Äytergä kiräk, küp kenä saytlar bäygedä qatnaşa başlağaç säxifälären yaxşırtqannar. Bu xaqta jyuri räise İrek Bikinnin:
Älege konkurs tatar internetı üseşendä zur rol' uynıy. Qayber saytlar konkursta qatnaşa başlağaç üz eşlären yaxşırttıllar. Mubrik.tk häm minem.pochta.ru saytları elek yaña komp'yuterında ğına eşli ide, xäzer xätta iske komp'yuterlarda da qarap bula.
Şulay itep bäyge tämam. Bu könnärdä päräwezdäge saytlar älege bäygegä häm yaña qabınğan tatar internetı yoldızlarına qarata üz mönäsäbätlären belderdelär. Niqädär keşe şul qädär fiker bulğannı isäpkä alsañ “Tatnet yoldız”ları tämamlansa da, anıñ tiräsendäge bäxäslär äle quyıra ğına bara.
Ciñüçelär isemlege cämäğätçelekkä bilgele bulğan könnärdä “Tatarlar.ru” häm tağın ber törkem saytlar “Tatnet yoldızları” bäygesendä qatnaşudan baş tarttı häm bu xaqta räsmi belderü tarattı. Älege belderüne bez sezgä dä citkerergä buldıq. "İke yıl rättän inde bäyge näticäläre qayber tatar saytları, şul isäptän "Tatarlar.ru"ğa qarata maxsus ob'yektiv tügel. Ä jyuri "qara piar" belän şöğellänep üzen ädäpsez tota. Tatar saytları forumında häm qayber tatar matbuğat çığanaqlarında maxsus pıçratu kompaniäse eşläde. Ul qayber bäygedä qatnaşuçılar häm bäygene oyıştıruçılar tarafınnan alıp barıldı. Şul isäptän "Tatnet yoldızları" bäygeseneñ jyuri räise İrek Bikkininnıñ şäxsi mönäsäbäte başqa bäygene bäyäläwçelärneñ bilgesenä tä'sir itä almıyça qala almadı. "Tatarlar.ru" bäygedä qatnaşunı üze öçen mäğnäsez dip taba häm bäyge näticälären qanunsız, ğämäldä bulmağan dip sanıy häm tigez bulmağan şartlarda, qanığu, yala yağu moxitendä bäygedä qatnaşudan baş tarta", - dip belderä bu törkem. Törkemgä Mäskäwneñ 1186 nçı mäktäbe, cırçı Rinat İbrahimov, Mälikä, Mäskäw töbäk milli-mädäni moxtäriäte, Mäskäwneñ “Qunaq” klubı saytları kerä. Şulay uq belderüdä uzğan yılğı näticälärgä dä ışanıçsızlıq kürsätelä häm: "Tatar internetı"na bik az mönäsäbäte bulğannarğa büläklär birelde", - dip tä iskärtelä. Bıyılğı nominatsiälar sanı da yuqqa kimetelde, dip sanala. Jyuriğa isä "Tatnet" oyışması häm Tatar internetına mönäsäbäte bulmağan çit keşelär tuldı, dip sanıy xäbärne taratuçı Timur Söläymanov. "Bez bäyge jyurisına ışanıçsızlıq kürsätäbez häm räsmi räweştä bäygedä qatnaşudan baş tartabız ", - dip yazıla anda.
Ä xäzer bu belderügä jyuri räise İrek Bikkinin fikerlären dä tıñlap qarıyq.
Niçek kenä bulmasın bäyge tämam häm älege konkurstan ul saytlarnı berkem çığara almıy. Çönki jyuri inde alarnı tikşergän, näticälären çığarğan.
Älege belderüdän soñ törle säxifälärdä tawış kutpı. Qaysı İrek Bikkinin, qaysı Timur Söläymanovnı yaqlawğa kereşte. Fiker alışular “Tatarsqaya gazeta”, “Yuldaş”, “Tatnet yoldızları”nıñ räsmi saytında häm başqa säxifälärdä bara. Ni disäñ dä näticälär yasalğan, ciñüçelär bilgele. Ciñüçelärneñ barlıq isemlege “Tatnet yoldızları” säxifäsendä birelgän. Anıñ adresı http://tatnet.tatar.info/ Ä ciñüçelärne qotlaw 28 avgust könne säğät unberdä “Tatmedia” binasında bulaçaq. “Tatarsqaya rassıylka”nıñ berençe sanı çığa başlağanğa bu könnärdä ber yıl buldı. Rassıylkada tatarlar tormışına bäyle gäcitlärdä çıqqan küp kenä yazmalar, şulay uq yaña xäbärlär urın ala. Bügenge köndä “Tatarskaya rassıylqa”ğa 500 keşe yazılğan. Anıñ xucası Bıltır baştaraq bu proyektnıñ barıp çığaçağına hiç ışanmağan. Xäzer rassıylqa belän qızıqsınuçılarnıñ sanı arta bara. Uquçılardan törle teläklär, räxmätlär süzläre, şul uq waqıtta tänqit belän dä yazılğan xatlar kilä, di Bıltır.
Rassıylkanıñ xucası töbäklärdä xäbärçelär buluın teli. Xäzerge waqıtta ul Almaniä tatarları belän tığız elemtädä tora, andağı millättäşlärebez turındağı yañalıqlar iñ berençe diärlek rassıylkada urın ala. Almaniä tatarlarınıñ päräwezdä üz säxifäläre dä bar. Anıñ adresı -http://tatary1.narod.ru/
Äytergä kiräk, rassıylqa älegä urıs telendä, läkin kiläçäktä anı tatarça çığaru niäte dä bar ikän. “Bälki ayırım tatar telendä rassıylqa eşlärmen. Älegä min latin imlasında çığarırğa äzer tügel, şuña kiril älifbasında bulaçaq”, - di “Tatar rassıylqa”sınıñ xucası Bıltır.
Soñğı waqıtta päräwezdä keräşen tatarlarına bağışlanğan säxifälärneñ sanı artuı sizelä. Xäzergä öç şaqtıy bilgele sayt eşläp kilä.
Pravoslav tatarları bitläre xucaları üz bitläre adresların küp kenä räsmi saytlar forumnarında qaldıra başladılar. Sayt ta yañara, büleklär könläp tügel säğätläp arta. http://pravoslavtatarlar.narod.ru/ adresı buyınça kersägez Pravoslav tatarları nindi bula, çirkäw häm millät, ğibädät qılu, tatar telendä pravoslav doğa, çirkäw bäyrämnäre häm tağın küp büleklärgä tap bulırsız.
Pravoslav tatarlarınıqınnan tış päräwezdä tağın keräşen tatarlarınıñ bäysez internetı bite açılğan. Anıñ adresı - http://www.kerashen-tatar.narod.ru/ Alda söylänep uzılğan pravoslav tatarları saytınnan ayırmalı bularaq, monda büleklär dä, mäğlümat ta bik az. Älege bittä xäbärlär az bulsa da, qunaq kitabına yazuçılar şaqtıy. Bu bittä dä pravoslav tatarları saytındağı kebek törle bäxäslär bara.
Ägär aldağı ike sayt eçtälek häm bizäleş yağınnan şaqtıy sıyıq bulsa
keräşen xalıqlarınıñ etnomädäni proyektında keräşennär turında böten yañalıqnı belep bula. Ämma aldağı saytlarda keräşen tatarları dip äytelsä, bu bittä tatar digän süz yuq. Monda barı keräşennär genä dielgän. Saytta alarnıñ mädäniäte, 2002 yıldağı xalıq sanın aluğa qarata mönäsäbätläre, massaküläm mäğlümat çaralarında alar xaqında çıqqan yazmalar häm başqa xäbärlär uqırğa bula. Säxifäneñ adresı - http://www.kryashen.ru/
Ägär äytelgän säxifälärneñ adresların isegezdä qaldıra almağansız ikän, yazmanı “Azatlıq” radiosınıñ saytınnan taba alasız. Adresı
http://www.azatliq.org/. Şulay uq älege säxifädä üz fikerläregezne dä qaldıra alasız.
Landış Xarrasova
