Sember ölkäsennän Däwlät Dumasında berdän-ber deputat Valentin İvanov Berdäm millätara mäğlümat agentlığı oyıştıru xästärlären kürä başlağan. Urıslar häm başqa millätlärneñ mänfäğätlären yaqtırtu buyınça Xalıqara akademiäneñ cirle bülekçäse bu eştä yärdäm itärgä äzer, di. Töp maqsatı – İdel buyı cirendä sputnik aşa teletapşırular, milli häm millätara kanallarnıñ maxsus sistemasın oyıştıru. Üzäktän atnasına 10-20 minutlıq tapşırular öçen waqıt telänep yörüneñ bernindi faydası da yuq, di deputat.
Mondıy täqdim belän, älege niätne tormışqa aşıruda mömkinleklärgä iä bulğan oyışmalar belän söyläşülär bulğan, şulay uq Boris Grıyzlov häm Sergey Kirienkoğa xat yullağannar. İlbaşı Putinğa da möräcäğät itmäkçelär ikän.
Monnan tış, deputat İvanov urıs-tatar-çuaş-muqşı tellärendä ğomum söyläwlek bastıru niäten dä belderde.
Ä älegä, anıñ tırışlığı belän, ölkäneñ töp räsmi basması “Narodnaya gazeta”nıñ comğa çığarılışında şul 4 xalıqnıñ berärse mädäniätenä qağılışlı säxifälär birelä başladı. Atna sayın. Dimäk, tatarğa da ayına ber märtäbä elägä. Eçtälege ällä ni bulmasa da, iğtibarı qäderle, diärgä yarıy inde.
Läkin şöbhä dä bar. “Ömet” gäzite redaktorı İsxaq Xälimev elegräk gäzitneñ “Balqış” isemle quşımtası çığarğa tieş, digän ide. Barlığı 3 san – avgust, üktäber, dikäber aylarında. Älegä – yuq. Konkursta grantqa layık bulsa da, 50 meñ rubl' tapmağannar ikän. Şöbhäse şul: “Narodnaya gazeta”nıñ säxifäläre şul wäğdä urınına tügelme ikän soñ?
Sember ölkäseneñ Pavlov rayonı üzägendä “İdel buyı töbäkläre” isemle Räsäy milli mädäniäteneñ regionara festivale buldı. Anda Çüpräledän Ence Şäräfetdinova citäkçelegendäge üzeşçän sänğät törkeme dä qatnaştı. Soñnan bu kollektiv İske Qulatqı rayonı Qaramalı awılında da çığış yasadı. Tatarstannıñ xalıq artistı Mönir Yaqupov ta, tuğan yağına qaytıp, şuşı uq rayonnıñ mädäniät yortında zur konsert birde. Ul şulay uq kürşe Pavlov rayonınıñ Cäyläw häm Tatar Şmalağı awılları xalqın da kürkäm tamaşa belän şatlandırdı. Aña bu ğämälendä cirle sanduğaçlarıbız Tahir Säläyev belän İldar Ramazanov ta yärdäm ittelär.
İske Qulatqı rayonı başlığı Färit Sanjapov citäkçelegendäge delegatsiä Tatarstannıñ Ispas rayonında bulıp qayttı. Bu säyäxät awıl xucalığı eşçänlegen oyıştıru täcribäse häm xalıqnıñ tormış-könküreşe belän tanışu maqsatınnan oyıştırılğan ide.
Ölkäneñ Çardaqlı häm İske Mayna rayonnarınıñ qayber awıllarında nindider säyer tölkelär işäyde. Alar qurıqmıyça uramda yörilär. Belgeçlär äytüençä, mondıy qıyulıqnıñ säbäbe ike genä bulırğa mömkin: alar yä bik aç, yä cenlängännär. Soñğısı İske Qızılsu awılında raslandı da. Waris ağay atın, eten, sıyırın üterep yandırırğa mäcbür buldı, çönki tabiblar alarnıñ tölkedän şul uq çir eläktergännären açıqladılar.
“Azatlıq” radiosı, Ayrat İbrahim, Sember.
