Accessibility links

Кайнар хәбәр

Tatarstan cämäğätçelege Säyfixan Nafievnı soñğı yulğa ozattı


2 sentäber dä, Tatarstan Konstitutsiäse mäxkämäseneñ, xäzer inde elekke başlığın Sayfixan Näfievnı soñğı yulğa ozattılar. Matäm çarasına ber meñgä yaqın keşe kilde. Çara Eçke eçlär ministrlığınıñ mädäni üzägendä ütte. Kilüçelär arasında, deputatlar, ministrlar, Sayfixan Näfiev belän törle yıllarda eşlägän keşelär, tuğannarı, tanışları, anıñ turında işetep kenä belgän keşelär dä bar ide. Märxümneñ räseme aldında çäçäklär öyeme üskännän üsä bardı, zalda uynap torğan moñlı köy cıyıluçılarnıñ küzlären yueşlätte. Bergä eşlägän keşelär, elekke duslar, Säyfixan Nafievnıñ ruxın xörmätläp, tabutı yanında, çiratlap basıp tordı. Matäm mitingın däwlät Şurası räise urınbasarı Yuriy Qamalatdinov açıp cibärde. Berençe bulıp, Tatarstan prezidentı Mintimer Şäymiev çığış yasadı. Ul elekke prokuror Säyfixan Xabibbulla ulınıñ Tatarstan däwlätçelege tözelgän qatlawlı yıllarda qılğan ğämällären iskä aldı. Mintimer Şäymiev, Säyfixan Nafievnıñ Tatarstan qanunnarın Rusiänekenä tänğälläşterergä telämiçä, wazifasınnan kitüe turında xatiräläre belän büleşte. Matäm çarasında Konstitutsiä mäxkämese başlığı urınbasarı, Yuğarı mäxkämä başlığı, Säyfixan Näfiev tuyıp üskän Çüpräle rayonı wäkille, Tatarstan möftie çığış yasadı. Soñğı könnärdä Säyfixan Nafiev belän Qırımda yal itkän Eçke eşlär ministrı Äsxät Säfärov, bergä ütkärgän minutlar turında söyläde. Yözärgä, gel xäräkättä bulırğa yaratqan, äzmäwerdäy gäwdäle Säyfixan äfändegä qarağanda, ul äle ozaq yıllar buyı yäşär, dip uylıy idek, dide Äsxät Säfärov. Şuña anıñ kinät kenä yöräge tibüdän tuqtawı, barlıq keşe öçen ayaz köndä yäşen yäşnägändäy buldı, dide Eçke eşlär ministrı. Matäm çarası şuşınıñ belän tämamlandı. Mäyetne uramğa alıp çıqtılar. Anda da xalıq cıyılıp tora ide. Elekke prokurornı soñğı yulğa ozatırğa kilgän ğadi tatar apası Säyfixan äfändeneñ ülemen küñelenä yaqın alıp, qayğıruın äytte. Säyfixan Nafiev tatar ziratında cirlände.

Bikä Timerova.
XS
SM
MD
LG