Accessibility links

Кайнар хәбәр

Rusiä xärbiläre kiläçäkkä uy - niätläre belän urtaqlaşa


İnde xäbär itelüençä, 2 sentäbr könne Ufada xärbilärneñ Bötenrossiä cıyını başlanğan ide. Aña Rossiäneñ barlıq respubliklarınnan häm ölkälärennän 300 dän artıq keşe kilde. Cıyınğa xärbilär belän bergä töbäklärneñ ğubernatorlar urınbasarları häm witse – premerları da çaqırılğan. Här respuliqadan häm ölkädän alardağı xärbi xezmätkä çaqıru qomissiäläre citäkçeläre kilde. Xärbilärneñ cıyını comğa könne dä däwam itte. Qunaqlar bu könne Ufanıñ Kirov rayonı xärbi qomissariatında, Alkinodağı xärbi bülektä, Yomatawdağı şifaxanädä häm başqa urınnarda buldı. Älege oçraşularda Mäskäwdän kilgän xärbi türälär ilneñ Saqlanu ministrlığınıñ kiläçäkkä qayber uy – niätläre turında da bäyän itte. Misal öçen, urta ğomum belem birü mäktäplärendä uquçılarğa, Sowetlar berlege yıllarındağı kebek ük, başlanğıç xärbi belem birü däreslären motlaq räweştä kertä başlaw küzallana ikän. Rusiä xärbi köçläre General ştabı citäkçese urınbasarı Wasiliy Smirnov soñğı yıllarda xärbi xezmätkä çaqırıluçı yegetlärneñ sälamätlege naçar bulu xaqında ayırım söyläde. Anıñ süzlärençä, armiä saflarına çaqırılu aldınnan ütkän meditsina tikşerüye näticäsendä yäş cilkençäk yegetlärneñ 70 protsentında beryülı berniçä törle çir buluı açıqlana. Şuşı uq xäl Başqortstanda da küzätelä. Ufada Rusiä xärbiläreneñ ğomum cıyını şimbä könne yomğaqlaw utırışı belän tämamlana.

Fänis Fätxi, Ufa
XS
SM
MD
LG