Accessibility links

Кайнар хәбәр

Äfğanstannıñ Hirat şähärendä Berläşkän Millätlär idaräsenä ut törtelde


Yäkşämbe Äfğanstan könbatışındağı Hirat şähärendä kierenkelekneñ kinät kiskenläşüe belän bilgelände. Kiçä anda, ilneñ prezidentı Xämit Qarzay ämere belän wilayätneñ küptänge xakime İsmail Xan eşennän alınğan ide. Ul üze monı räsmän qabul itüen beldersä dä, anıñ açulı tarafdarları tönlä taşlar belän ike amerikan ğäskärienä höcüm itte, köndez isä İsmail Xannı yaqlağan yözlägän keşe, "Qarzayğa ülem!", "Amerikağa ülem!", "Bez İsmail Xannı telibez" dip qıçqırıp Berläşkän Millätlärneñ Hirattağı idaräsenä ut törtte.

Moña cawap itep Qabuldağı üzäk xökümät Hirat buylap äfğan qorallı köçläreneñ büleklären urnaştırdı. Radiobıznıñ şul könbatış äfğan şähärendäge xäbärçese Basıyr Begzad, äfğan xökümäte häm amerikan xärbilären xäzer bar Hirat buylap kürep bula dip xäbär itä.

Audio, Basıyr Begzad

"Şähär xäzer Äfğanstannıñ Milli ğäskäre qulında kebek kürenä, alar şähärdäge töp uramnarnı häm uram kiseleşlären kontrol'' itä. Uramnarda şulay uq amerikan xärbiläre dä kizüdä yöri, Hirat östennän ara-tirä Quşma Ştatlarnıñ xärbi oçqıçı da oçıp uza. Şuşı köçlär İsmail Xannıñ öye tiräsendä dä urnaştırılğan" dip belderä könbatış Äfğanstannan radiobıznıñ andağı xäbärçese. Soñğı mäğlümatqa, İsmail Xan torğan çirdä dä xökümät ğäskärlären urnaştıruğa kilgändä, Äfğanstannıñ eçke eşlär ministrı urınbasarı Xilaletdin Xilal radiobızğa, bu hiç kenä dä elekke xakim öyen qamap alunı añlatmıy dip belderde. Hiratqa ğäskär kertkän çaqta anda İsmail Xan tarafdarları belän atışlar buluı xaqında da xäbär itelä. "Reuters" agentlığı ber tabib birgän mäğlümatqa tayanıp, şul bäreleşlärdä kimendä 7 keşeneñ hälak buluı turında äytä. Äfğanstannıñ eçke eşlär ministrlığındağı ikençe ber xezmätkär Şah Mäxmüt Miaxel, wäzğiat alay uq qatlawlı tügel, keşelärneñ üz açuın belderü xoquqı bar, läkin monıñ köç qullanuğa küçüenä yul quyılmayaçaq dip kisätte. Anıñ süzlärenä qarağanda, İsmail Xannı eşennän alu da näq menä Hirattağı kierenkelekne kimetü maqsatında eşlängän. İnde äytelgänçä, İsmail Xan prezident Qarzaynıñ şuşı ämeren, xakim urınında üzen Ukrainadağı äfğan ilçese Säit Möxämmäd Xäyerxağa almaştırunı qabul itüen beldergän ide. Läkin ul berük waqıtta Qabulda ministr bulu täqdimen kire qaqtı. Anıñ belän prezident Qarzay arasında mönäsäbätlär mart ayında, İsmail Xannıñ ulı, sivil aviatsia ministrı Mirwäğiz Sadıyq, Äfğanstannıñ saqlanu ministrlığı qulı astındağı törkem belän bäreleştä üterelegännän soñ bozılğan ide. Moñardan tış İsmail Xannıñ, döresräge anıñ tarafdarlarınnan torğan qorallı militsiäneñ uzğan ayda, Äfğanstan milli ğäskäreneñ cirle başlığı Amanulla Xan suğışçıları belän dä bäreleşläre buldı.

Kärim Kamal
XS
SM
MD
LG