Monopoliälärgä qarşı federal’ idäräneñ Tatarstan bülekçäse yänä üzeneñ iğtibarın Qızıl Şärıq kompaniäsenä yünältte. İdäräneñ baş belgeçe Lyubov’ Cabbarova süzlärenä qarağanda, bu yulı da älege sıra citeşterü şirkäte Rusiäneñ Reklama turındağı qanunın bozuda ğäyeplänä. Bu qanun taläpläre buyınça sıra reklaması balalar, mäğärif, sport, mädäniät oyışmaları yanında urnaştırılmasqa tieş. Ä Qızıl şärıqnıñ reklama iğlannarı Qazan ciñel sänäğät institutı häm Ğäliäskär Kamal teatrı binaları yanında urnaşqan ikän. Älege monopoliägä qarşı idärä tarafınnan tikşerü eşläre alıp barıla.
Tatarstanda urıp-cıyu eşläre tämamlandı. Respublikanıñ Awıl xucalığı ministrlığı mäğlümätlärenä qarağanda, bıyıl 4 million tonnadan artıq uñış cıyıp alınğan, uñış ber gektardan urtaça 27,5 sentnernı täşkil itkän. Şulay itep, bıyıl uñış uzğan yıllardağı kebek rekordlı bulmağan. Çärşämbe könne Qazannıñ hawa alanına alıp bara torğan yaña, zamança texnologiälär nigezendä eşlänelgän yul açıldı. Aeroportnıñ üzendä dä üzgäreşlär bar. Yaqın kiläçäktä anda östämä qurqınıçsızlıq saqlaw cihazları urnaştırılaçaq, dip xäbär itä İntertat.ru elektron gäcite. Älege cihazlar Rusiädä soñğı arada yışayğan terror aktları nisbätennän xalıqnıñ qurqınıçsızlığın tä’min itä niätennän quyılaçaq.
Tatar opera häm balet teatrında tözekländerü eşläre bara. Şuña da qaramastan, teatrnıñ truppası eşsez utırmıy. 15 sentäber könne Salix Säydäşev isemendäge Qazannıñ Zur konsertlar zalında Jorj Bizenıñ Ence ezläwçelär operası belän opera häm balet teatrı üzeneñ 66 sezonın açtı. Kiläse yılnıñ yül ayında, tözekländerü eşläre tämamlanğaç, teatr üzeneñ yañartılğan binada eşli başlawın zur konsert belän bilgeläp ütäçäk. Älege konsertta qatnaşuçı öçen inde xäzer ük tanılğan opera cırçıları Dmitriy Xvorostovskiy, Katya Riçarelli belän söyläşülär alıp barıla.
Gölnaz İlgizär
