Ğiraq eçke eşlär ministrlığı äytüençä, bügen irtän qorallı keşelär Bağdad üzägendäge ber yorttan ike amerikannı häm ber britannı totıq itep alıp kitkän. Bu xäbärne Bağdadtağı AQŞ häm Britan ilçelekläre dä rasladı.
Ministrlıq äytüençä, bu keşelär Bağdadnıñ küp kenä çit il käsepçeläre häm eşçeläre yäşi torğan bay, äl-Mansur rayonında yäşägän bulğan.
Alar Berläşkän Ğäräp Ämirleklärendä terkälgän tözeleş şirkätendä kileşü nigezendä eşlägän.
Soñğı aylarda Ğiraqta 100-dän artıq çit il watandaşı totıq itep alındı. Alarnıñ kübese azat itelde, ämma 20-läp totıq üterelde.
