Accessibility links

Кайнар хәбәр

Sverdlov ölkäse möselmannarı tormışında zur waqiğa


Küptän tügel Sverdlov ölkäse möselmannarı tormışında ruxani yaqtan ğına tügel, säyäsi yaktan da bik zur ähämiätkä iä bulğan waqiğa bulıp uzdı. Qazıylat diniä idäräseneñ üzäge bulğan Pervoural'ski şähärendä ör-yaña mäçet açıldı.

Mäçet açılu tantanasına Rusiäneñ küp kenä töbäklärennän qunaqlar çaqırılğan ide. Mäskäwdän Rusiä möftilär şurası räise Rawil' Gaynetdin, Rusiäneñ Aziä öleşe möselmannarı diniä idäräseneñ baş möftie Näfiğulla Aşirov kildelär. Şulay uq Tatarstan, Başqortstan, Xaqasiä respublikalarınnan, Tömän, Perm, Çiläbe, Kurgan häm başqa küp kenä ölkälärdän qunaqlar küp cıyıldı. Din ähellärennän tış, biredä xakimiät wäkillären dä, deputatlarnı da, kürenekle cämäğät eşleklelären dä kürergä bula ide. Ä inde tantanağa Rawil' Gaynetdinnıñ üze kilüe bu waqiğanıñ däräcäsen tağın da kütärep cibärde.

Rusiäneñ möftilär şurası räiseneñ Sverdlov ölkäse cirenä kilüe barlıq massaküläm mäğlümat çaralarınıñ iğtibar üzägendä buldı. Maxsus oyıştırılğan press-konferensiä waqıtında jurnalistlar üzlären qızıqsındırğan sorawlarnı yawdırdılar. İğtibar üzägendäge waqiğalarnıñ berse – Sverdlov ölkäse gubernatorı Eduard Rossel' tarafınnan Rawil' Gaynetdinne qabul itü buldı. Oçraşu jurnalistlardan başqa, küzgä-küz ütte. Möfti xäzrät söyläwençä, gubernator Sverdlov ölkäse möselmannarınıñ cämğiättäge role turında söylägän, küpmillätle ölkädä tigez, dus bulıp yäşäwlärenä qänäğät buluın beldergän. Şulay uq cirle xakimiät orğannarınıñ säyäsi yaqtan da, başqa yaqtan da tatarlarnıñ, başqortlarnıñ häm başqa möselmannarnıñ ixtıäcları belän xisaplaşuın assızıqlağan.

Gubernatornıñ ölkä möselmannarına qarata bulğan yaxşı mönäsäbäte Rusiä möftilär şurası tarafınnan iğtibarsız qalmağan. Sverdlov ölkäsendä utızdan artıq mäçet buluın iskä alıp, gubernatornıñ möselmannarğa här yaqlap yärdäm itüe, cämğiättä millätara tigezlek, duslıq saqlap qaluda başqarğan zur eşläre öçen Rawil' Gaynetdin Eduard Rossel'gä islam oyışmalarınıñ iñ yuğarı bülägen – berençe däräcä “Äl'-Faxr” ordenın tapşırğan.

Sverdlov ölkäsendä din-äxlaqnı üsterüdä zur köç quyuçı, Pervoural'ski mäçeten saluda üzlärennän bik küp öleş kertüçe qärdäşlärebezgä dä Rawil' Gaynetdin “Ruxi berdämlek” medalen tapşırdı. Ul medal'gä Qazıylat idäräse räise Danis xäzrät Däwlätov, metsenatlar Rinat Askarov, Röstäm Xalikşin, Krasnoufim tatar milli avtonomiäse räise Räsimä xanım Safina, aqsaqallar şurası citäkçese Räis Nurimanov kebek möselmannar belän bergä Pervoural'ski şähär xakimiäte başlığı Vitaliy Vol'f, ölkä Duması räise urınbasarı Nail' Şäymärdanov ta layıq buldılar.

Mäçet açılu tantanası bik canlı, küñelle uzdı. Pervoural'ski şähärendä şundıy matur, mähabät mäçet açılu tantanasın oyıştıru din-islam yulına tuğrı xezmät itüçe Qazıylat diniä idäräseneñ däräcäsen kütärde, alğa taba xakimiät orğannarı, cämäğätçelek belän eşçänlegenä yaña sulış örde.

Fäwiä Safiullina.Yekaterinburg.

XS
SM
MD
LG