Accessibility links

Кайнар хәбәр

Tatarstanlılar Germaniä belän tanıştı


Tatarstanda Germaniä könnärenä 22nçе sentäber könne Sälix Säydäş isemendäge zur konsertlar zalında yomğaq yasala. Respublikada ber ayğa yaqın däwam itkän Germaniä könnärenä bağışlanğan çaralar Rossiädä ütkän Germaniä yılı qısalarında oyıştırıldı. Respublikada Germaniä könnären 27nçе avgust könne FRGnıñ Rossiädäge ilçese Xans-Fridrix fon Plez açtı.
Qazanğa kilgän 250gә yaqın Germaniä qunaqları arasında säyäsätçelär, ğalimnär, uqıtuçılar bar ide. Alar törle oçraşular, söyläşülär alıp bardı. Mäs'älän, 8nçе sentäber könne tatarlar häm almannar tel, ädäbiät häm tarix institutında säyäsi temağa fiker alıştı. Törle ölkälärdä alda baruçı Germaniä söt citeşterüdä dä aldınğı urında tora ikän. Şuşı könnärdä ütkän awıl xucalığı buyınça xalıqara konferensiädä almannar tatarstanlılarnı sıyır söten arttırırğa öyrätte. Anıñ öçen almannar sıyırğa vitaminnar ğına aşatıp, anı çit il texnologiäse yärdämendä sawıp, sötne tieşle temperaturağa xätle suıtu häm başqa törle çaralar täqdim itte.
Şuşı uq könnärdä Rossiädä Germaniä yılı qısalarında Piter-Ästerxan säyäxäten uzdıruçı “Georgiy Jukov” isemle teploxod dürt köngä Qazanda da tuqtalış yasadı. Bu säyäxättä qatnaşuçı Tatarstan wäkilläre alman zıyalıları belän tanışıp, törle säyäsi, mädäni çaralarda qatnaştı. Bu könnärdä başqalanıñ milli kitapxanäsendä Rossiä almannarınıñ tarixın häm mädäniäten yaqtırtqan kitap kürgäzmäse dä uzdı.
Germaniädän törle rok, pop konsert törkemnäre, ä iñ möhime tanılğan “Traxteokapella” fol'klor ansamble dä kilde. Ä 11е sentäber könne Sälix Säydäş isemendäge konsert zalında Germaniä orkestrı qatnaşlığında böten dönyağa tanılğan rus opera cırçısı Lyubov' Kazarnovskaya cırladı. Älege könnär qısalarında Qazan kinoteatrlarında almannarnıñ iñ yaxşı fil'mnarın da kürergä mömkin buldı.
Germaniä Tatarstannıñ tışqı säwdäsendä dä iñ zur partnerı. Xäyer, tatarlarnıñ Germaniä belän qızıqsınuı elektän ük kilä. Utırdım at bilenä, kittem German cirenä, dip cırlana xalıq cırında da. Şunlıqtan Rossiädä Germaniä teması bu könnärdä köçle yañğıradı.
Al'bina Zäynulla, Qazan.
XS
SM
MD
LG