Accessibility links

Кайнар хәбәр

Tatnet: tatar gäzitlären internet aşa uqıp bulamı?


«Watanım Tatarstan» gäzite zamança bulırğa tırışa. Töp räsmi tatar gäziteneñ elek tä säxifäse bar ide, ämma anda moña gäzit yazmaları urnaştırılmıy ide. Küptän tügel, saytta üzgäreşlär barlıqqa kilde häm gäzit yazmaların, dönyanıñ teläsä qaysı poçmağınnan torıp ta uqu mömkinlege tudı. www.vatantat.ru. Moña qädär gäzit citäkçelege saytnı yañaça eşlätergä cıyınuı häm internetta eşli belüçelär arasında bäyge iğlan itkän ide. Bäygeneñ närsä belän tämamlanuı bilgele tügel, ämma saytta gäzit materialları kürenä başladı. Biredä yazmalar gäzittän soñ çığa bara. Mäsälän, çeltärdä, comğa könne, düşämbe mäqälälären genä uqıp bula. Kompyuterığız tatarça xäreflärne añlamasa, tatar xäreflären sayttan sıyırıp alıp, üz maşinağızğa urnaştıru mömkinlege dä birelä. Tatarça xäreflärne başqa saytlar da buşlay tarata. Mäsälän, «Şähri Qazan» gäziteneñ saytı da şundıylardan. Ul shahrikazan.narod.ru adresında urnaşqan. Bu gäzitneñ, reklama yözennän genä yasalğan säxifäse bulıp tora. Anda yazmalar daimi urnaştırılıp barmıy. Barı tik qayber materiallar belän genä tanışırğa bula. «Tatarstan yäşläre» gäziteneñ dä internet säxifäse bar. Anıñ adresı ğadi: tatyash.ru . Bu säxifädä, şulay uq, gäzittä çıqqan mäqälälär, käğäzdäge gäzitkä qarağanda soñarıp basılıp bara. Alarnı üzeñ telägän älifbada, kirilça da, latinça da uqırğa mömkin. Qazanda çığuçı urıs telle gäzitlärneñ internettağı säxifäläre, tatarça gäzitläreneñ saytlarına qarağanda, küpkä otışlıraq. Mäsälän «Вечерняя Казань», «Республика Татарcтан» gäzitläreneñ web-bitläre köndä yañarıp tora häm anda meñlägän keşe kerep yöri. Urıs telle respublika gäzitlärneñ web-masterları, etatar.ru yañalıqlar säxifäse xäbärçesenä beldergänçä, Tatarstandağı gäzitlär internettağı säxifälären üsterü öçen äz tırışlıq quya. www.rt-online.ru saytı baş möxärrire beldergänçä, 1 yıl eçendä, «Республика Татарcтан» gäzite saytınıñ global çeltärdä qabatlanu indeksı 30% artqan. Bez başta telgä alğan «Watanım Tatarstan» gäziteneñ internet säxifäsenä älegä bu sannar xaqında xıyallanırğa qına qala. Alayda üzgäreş bar. Gäzitneñ yazmaların internet aşa uqırğa telägän millättäşlär öçen adresnı qabatlıym www.vatantat.ru.

Bikä Timerova.

XS
SM
MD
LG