Accessibility links

Кайнар хәбәр

Ayatolla Ali As-Sistani Ğiraqta saylawlar bilgelängän waqıtta ütärgä tieş dip sanıy


Ğiraq şiğiläreneñ yuğarı ruxi yulbaşçısı Ayatollah Ali as-Sistani, ildä kiläse yılnıñ ğinwarına bilgelängän saylawlar waqıtında ütergä tieş, dip belderde. As-Sistani'nıñ matbuğat wäkile Hamid Xaffaf, bügen Azatlıq radiosına birgän äñgämäsendä, As-Sistani, saylawlar uzdıruda zur rolne Berläşkän Millätlär Oyışması uynarğa tieş, dip sanıy, dide. (audio) "Sistani menä närsälärgä basım yasıy: berençedän, saylawlar bilgelängän waqıtta uzarğa tieş. ikençedän, ul, saylawlarnıñ ğadel häm irekle buluı öçen protsessqa Berläşkän Millätlär Oyışmasınıñ qatnaşuı kiräk, dip sanıy." dide as-Sistani'nıñ matbuğat wäkile. Ul şulay uq ğiraqlılar tawış birüdä qatnaşır dip ömetlänä. Kiçä Amerika Quşma Ştatları saqlanu ministrı Donald Rumsfeld, saylawlar – ilneñ köç qullanu däwam itkän töbäklärendä ütmäskä dä mömkin, dip belderde. Kiçä amerikan kongressı aldında çığış yasağanda Ğiraqnıñ waqıtlı premyer-ministrı İyad Allawi, Ğiraqnıñ 18 provinsiäseneñ 14ndä wazğiät imin dip belderde. Ğiraq eçke eşlär ministrlığı, Orascom isemle Misır telekom şirkäteneñ kimendä 8 xezmätkäre urlandı, dip xäbär itte. Misır ilçelege totıq alu turındağı xäbärne rasladı. İldä köç qullanu däwam itä. Falluca şähärenä amerikan köçläre hawa höcümnäre yasadı. Dhuluiya şähäre yanında 7 ğiraq keşese häm 3 xärbi hälak bulğan dip xäbär itelä.
XS
SM
MD
LG