Accessibility links

Кайнар хәбәр

Ufa «Nur» teatrı yaña icat yılın açtı


Başqortstan sänğät kollektivları ber – ber artlı üzläreneñ çirattağı icat mizgelen aça. 28 sentäbr könne Ufa «Nur» tatar däwlät drama teatrı da üzeneñ 13nçe icat yılın açıp cibärde. Teatrnıñ icadi köçläre täwge könnän ük üz tamaşaçılarına premyera täqdim itä. Alar üzlärendä äle moñarçı quyılmağan klassik säxnä äsäre – Mirxäydär Fäyzineñ «Ğäliäbanu» dramasın säxnäläşterde. Ni öçen näq menä şuşı tamaşa belän açarğa bulğan soñ nurlılar bu yılnı? «Ğäliäbanu»nı säxnägä quyğan rejisser Alik Qasıym ulı Säfiullin belän äñgämäne Azatlıqnıñ sişämbe tapşıruında tıñlıy alasız. Teatrnıñ icat yılın açıp cibärgän «Ğäliäbanu» spektakle premyerası rättän öç kön baraçaq. Tamaşalarğa biletlar küptän satlıp betkän inde. Bu icat mizgelendä teatrnıñ icadi köçläre üz tamaşaçılarına yaña premyeralar da äzerlärgä cıyına. Rejisser belän söyläşüdä bez «Nur» teatrınıñ zur zalı tözeleşeneñ qayçan tämamlanaçağı belän dä qızıqsındıq. Ämma quanıçlı cawap alınmadı bu sorawğa. Alik äfände äytüençä, tözeleş tämam tuqtalğan häm zur zalnıñ qayçan açılaçağın xäzer berkem dä anıq qına äytä almıy. Zur tamaşa zalın bıltır, Tatarstannan da yuğarı citäkçelärne çaqırıp, tantanalı açqannar ide inde. Ämma Başqortstan prezidentın saylawlar aldınnan oyıştırılğan ul tantanalı açu ğap – ğädi ber küz buyaw ğına bulıp çıqtı. Şul tantanadan soñ zur zalnıñ yañadan açılğanı da yuq. Ä bit, irken säxnädä uynaw niäte belän, nurlılar kümäk keşe qatnaşa torğan ör – yaña öç spektäkl säxnäläştergän ide. Küpme köç häm finanslar tügep äzerlängän tamaşalarnı teatr sänğäten söyüçelärgä täqdim itü bilgesez waqıtqa qädär kiçekterelep tora. Bälki kiläse prezident saylawlarına zur zalnı da faydalanuğa tapşırırlar äle. Aldağı saylawlarğa nibarı öç yıl ğına qalıp bara.

Fänis Fätxi, Ufa
XS
SM
MD
LG