Başqortstan üzeneñ Respublika könen bäyräm itärgä äzerlänä. Älege bäyrämne oyıştıru komitetı Respublika könenä bağışlanğan tantanalı utırışnıñ 8 üktäber könenä bilgelänüen xäbär itte. Tantanalı utırış, här yıldağıça, Başqortstan däwlät opera häm balet teatrında ütäçäk. Başqortstan Däwlät Cıyılışı deputatları, Prezident Sowetı, respublika xökümäte äğzaları häm başqa yuğarı citäkçe oyışmalar wäkilläre qatnaşaçaq bu tantanalı çarağa kürşe töbäklärdän dä qunaqlar çaqırıla. Här yıldağıça, Başqortstan Respublikınıñ däwlät bäyrämenä Tatarstannan da yuğarı citäkçelär kiläçäge mäğlüm. Ämma älegä alarnıñ kemnär buluı xaqında ğına täğayın xäbär citkerelmäde.
Respublika könenä bağışlanğan bäyräm qısalarında oyıştırıluçı qayber mädäni häm sport çaraları bu şimbä häm yäkşämbe könnärendä ük ütäçäk. Misal öçen, yäkşämbe könne Ufa xaqimiäte prizlarına ciñel atletiqä buyınça açıq marafon häm «Millätlär bäygese» digän Bötenrusiä yögerüçelär köne ütkäreläçäk. Rayonnarda häm şähärlärdä dä bu atna azağı respublik könenä bağışlanğan konsertlar häm sport bäygeläre oyıştıru qaralğan. Başqortstannıñ suwerenlıq aluına bäyle bäyräm itelä başlağan Respublika köne soñğı yıllarda qarşılıqlı fikerlär dä tudıra. Yıldan – yıl möstäqillekne yuğalta barğan ber wäzğiättä Respublika könen tantanalı itep uzdıru öçen älläni quanıçlı säbäplär dä yuq kebek. Ämma xäzer inde bu bäyräm ğädätkä kerde häm anı bıyıl da zurlap bilgeläw öçen küp tırışlıq salına.
