Bu düşämbedä häm yal könnärendä Tatarstanda millätne teträndererlek yañalıqlar bulmadı. Prezident Mintimer Şäymiev yalda waqıtta anıñ wazifaların Konstitutsiä buyınça prem'yer-ministr Röstäm Miñnexanov üti. Ul xucalıq, iqtisat mäs’äläläre buyınça bik küp utırışlar ütkärde, respublikanıñ törle töbäklärendä buldı. Säyäsät häm soñğı waqıtta aktual'läşep kitkän xakimiät vertikale turında räsmi belderülär yuq. Mintimer Şäymievnıñ 13 sentäberdä Vladimir Putinnıñ täqdimnären nigezdä xuplawı turında belderü yasağannan soñ, räsmi çinovniklar iqtisat häm sotsial' mäs'älälär turında ğına çığış yasıylar. Deputatlar, säyäsätçelär zur saqlıq belän, moñsuraq qına ğomumi süzlär äytä. Tatarstan säyäsätçeläreneñ äytelmägän wasıyätlären işetergä xäzergä waqıt citmäsä dä, milli xäräkät wäkilläre Xäter könendä üz fikerlären iğlan itärgä cıyınalar.
Färit Möxämmätşinnıñ Sarıtawğa barıp, Yevropa sovetı qarşındağı töbäklär kongressınıñ mädäniät häm mäğärif komitetı utırışında qatnaşuı turında qısqaça xäbärlär bar. Zur İdel yulı proyektına şuşı kongressnıñ iğtibarın cälep itü täqdime yañğırağan anda. Ä menä Qazan şähär Sovetınıñ uzğan atna axırında bulğan sessiäsendä tarixi häykällär häm milli üseşkä bäyle mäs'älälär dä tikşerelgän. Bu utırışta borınğı mäçetlärne saqlaw, ayırım alğanda Peçän bazarı mäçete yanqırması tiräsendäge bäxäs tikşerelmägän.
Vostoçnıy ekspress gäziteneñ mäğlümäte buyınça, Qazan xakimiät başlığı Kamil İsxaqov şähärdä barğan tözeleş, yaña proyektlar turında ilhamlanıp söylägän. Elekke Sverdlov uramına Peterburg iseme birelgän. Häm bu uramnı Peterburg tözekländeräçäk. Monıñ öçen Peterburgnıñ byudjetına 150 million sum aqça salınğan, dip belderde Kamil İsxaqov. Ul Qazan izge ana ikonası häm xäzerge säyäsät turında şundıy belderü yasağan. Qazanlılarnıñ häm tatarstanlılarnıñ yazmışına qazan izge ana ikonasınıñ Rusiägä qaytuı zur tä'sir yasayaçaq, digän. Bu ike waqiğa — ikona qaytu häm xakimiät reforması ber-ber artlı buldı. Monıñ artınnan kilgän tağın ber waqiğa da onıtılmasın ide, digän Kamil İsxaqov. Eş şunda ki, Qazan xäzer munitsipal' şähär okrugı statusın aldı. Bu üzgäreş Qazanğa dönya bankınnan 125 million dollar kredit alırğa mömkinlek biräçäk. Ä xakimiät reformaları turında İsxaqov saqlanıp qına, bez xakimiätneñ törle formaların kürdek, bu turıda soñraq näticä yasarbız, digän. Häm, bälki, yaña sxema fayda da kiterer, dip beldergän Qazan xakimiäte başlığı.
Rimzil Wäli
