«Yañalıqlar» digän Rusiä agentlığı, ber törkem tatar zıyalılarnıñ möräcäğäten tarattı. Anda äytelgänçä, tatar isemnären yörtüçe bilgele keşelär, qayber avtonomiä räisläre, din ähelläre Tatarstan xalqına möräcäğät itep, latin grafikasına küçärgä aşıqmasqa çaqıra. Bu yulı xatnı imzalağan keşelär, lingvistik häm säyäsi yaqlarnı çittä qaldırıp, mäs’äläneñ praktik yağına iğtibarnı yünältä. Yazunı alıştıru küp finans çığımnar taläp itäçäk, uqıtuçılarnı xäzerläw, ike yazuda da dokumentlar yörtergä turı kiläçäk, digän dälillär kiterä alar. Bolar barısı da, tatar tele belän qızıqsınunı kimetäçäk, dip sanıy Rusiäneñ Tennis federatsiäse başlığı Şamil Tarpişev, yazuçı Näcib İsänbay, xalıq şağire Marat Karimov, kompozitor Almaz Monasıpov h.b.
Rusiä Fännär Akademiäseneñ Ufa üzäge prezidiumı räise Robert Niğmätullin da, bu mäs’älädä borçılu belderä. Ul, kirill xäreflärennän kitü -Rusiä eçendäge ruxi separatizm, dip belderä. Urıs ruxı töşenkelektä bulğan bu waqıtta, kirill xäreflären baş tartu, ruslar tarafınnan rus mädäniätennän kitü, dip bäylänergä mömkin, digän fikerdä tora Robert Niğmätullin. Tatarstanda yäşäp icat itüçe xalıq şağire häm «Qazan utları» jurnalı baş möxärrire Rawil Fäyzullin isä, äytep ütelgän zıyalılar belen kileşmi häm başqa fiker belderä: « Soñğı waqıtta bu mäs’äläneñ yañadan qalqıp çığuına Konstitutsiä mäxkämäseneñ mäs’äläne tikşerä başlawı säbäpçe bulğan ikän. Bu eşneñ säyäsi xarakter aluı mine bik borçıy. Ber törkem zıyalılarnıñ bu uyınnarda qatnaşuı mäs’äläneñ säyäsi yassılıqta qaraluın kürsätä. Älege keşelär tatar tele turında borçıla ikän, üzläre yäşägän töbäklärdä tatar telen üstererlär, tatar gäzitlären aldırırlar ide. Alar ğömerlärendä ber tatar kitabın uqığan mikän? Nindi genä qarar qabul itelmäsem, ul latinğa küçü xäräkäten tuqtatmayaçaq.»Bikä Timerova.
