Paqstannıñ Multan şähärendä maşina şartlap kimendä 39 keşeneñ hälak buluına kitergän terror ğamälennän soñ köç qullanu başlanmasın öçen bügen uramnarğa polisiä häm yarım xärbi ğaskärlär çığarıldı. Şartlaw – sönnilärneñ uzğan yıl üterelgän yulbaşçısı Azam Tariq'nı iskä alır öçen cıyılğan waqıtta buldı. 100dän artıq keşe cärähätlär alğan. 6 kön elek ilneñ könçığışındağı Sialkot şähärendä mäçettä intixar terrorçısı üz üzen şartlatıp 30 şiği möselmanı hälak bulğan ide. Räsmi mäğlümatlärgä qarağanda – bügenge şartlaw – üç alu maqsatı belän oyıştırılğan bulğan. Cıyında qatnaşuçılarnıñ küpçelege – şiğilärgä höcümnär oyıştıruda ğayeplängän tıyılğan sönni törkeme wäkilläre ide, dip xäbär itelä.