Yevropa Sovetınıñ Parlament assambleyası wäkilläre sişämbe kiçendä jurnalistlar belän oçraştılar. Başqa oyışmalar häm säyäsi eşleklelär belän oçraşu waqıtında David Atkinson häm Rudolf Bindig waqıtnı tiz totıp, bik az sanlı şäxeslärneñ fikeren tıñlasalar, Tatmedia agentlığında ütkän oçraşu başqaçaraq buldı. 100gä yaqın jurnalist, redaktorlar belän oçraşqanda qunaqlar niçek tä äñgämädäşlärneñ tellären çişärgä tırıştı. Lev Ovrutskiy, Räşit Ğällämov, İrek Mortazin, Cäwdät Äminev, Miläwşä Aytuganova, Artem Karapetyan, şulay uq Azatlıq radiosınıñ Qazan bülege wäkile bügenge Tatarstanda süz iregeneñ torışı turında ixlas fikerlären äyttelär, bäxäslär dä buldı. Ämma, Yevropa Sovetı wäkilläre Rusiädäge mäğlümat iregenä bäyle artıq kisken problemalar taba almadı. Barı tik däwlät yärdämendä çığuçı mäğlümat çaralarınıñ küplege genä alarnı şaqqatırdı. İñ töp problema – aqça citmäw häm, qayber jurnalistlar fikerençä, zur xaqiqätne işetergä dä, taratırğa da telämägän bügenge cämğiät. Şul isäptän, jurnalistlar, tıñlawçılar, uquçılar da.
Lev Ovrutskiy üzeneñ 8 yıl buyı oppozitsiädäge jurnalist buluın, ämma xakimiätneñ ni öçender anı ezärleklämäwenä ğäcäplänüen belderde. Tatarstan prezidentı süz iregen yaqlıy, ämma anıñ urınına Mäskäwdän bilgelängän şäxes yäki kürşe respublikalarnıñ xäzerge citäkçeläre Leonid Markelov, Mortaza Räximov kebek keşelär kilsä, eşlär yaman bulaçaq, dide ul. Yevropa Sovetı wäkilläre respublika belän tanışunı däwam itälär.
Çärşämbe köneneñ iñ möhim yañalığı – Däwlät Sovetınıñ çirattağı 5нче sessiäse eşläde. Anda deputatlar şähär, rayon başlıqları, şulay uq Tatarstan prezidentı qatnaştı. Kön tärtibenä quyğan 40 tan artıq mäs’äläneñ berse - 2005 yılğa byudjet qabul itü. Yılnıñ iñ zur finans dokumentı raslandı, kiläse yılda çığımnar belän keremnär arasında mönäsäbätlär şaqtıy kierenke. Çığımnar kübräk, ä kerü kimi bara.
Rimzil Wäli
