Accessibility links

Putin Buşnıñ yañadan saylanuın yaqlawı xaqında işarä cibärde


Russiä prezidentı Putin Düşämbedä press-konferensiädä yasağan çığışında Ğıraqtağı höcümnär prezident Buşnıñ yañadan saylanuın buldırmau maqsäten küz aldında tota dip belderde. Gärçä, ul AQŞ prezident saylaularında kemneñ ciñep çığın teläven äytmäsä dä, anıñ soñğı vaqıtlardağı belderüläre Buşnı yaqlauın kürsätä.

Russiä prezidentı Putin Düşämbedä press-koneferensiädä yasağan çığışında Ğıraqqa interevensiä mäsäläsendä Buş belän ber fikerdä bulmauın häm Russiäneñ İminlek Şurasınıñ daimi ağzası bularaq Ğıraq suğışına qarşı tauış birgänen äytep kitsä dä, anıñ terrorizm belän Buşnıñ yañadan saylanuı arasında bäyläneş kürüe, kemne yaqlauın açıq kürsätte.

Audio

"Xalıqara terrorizm Buşnıñ ikençe möddätkä saylanuın buldırmaunı maqsät itep quya. Teroristlar bu maqsätkä ireşkän xäldä, bu alar öçen Amerika häm nindider ber däräcädä xalıqara anti-terror koalitsiä östennän möhim taktik ciñüe bulaçaq."

Döres Putin prezident kandidatları turında nindi dä bulsa fiker belderüdän totlıp qaldı.

Audio

"Bu saylau kampaniäsendä amerikan xalqı kemne saylasa bez monı qabul itep saylanğan prezident belän bergä eşliäçäkbez. Min ber genä kandidat belän dä mönäsäbätläremne bozarğa telämim."

Läkin, şulay da Putinneñ Buşnıñ saylanmauı terroristlar öçen ciñü bulaçaq digän fiker belderüe , anıñ kemne yaqlauın açıq kürsätä. Küräseñ ul häm Kreml kiñäşçeläre Buş progmatigıraq citäkçe häm ul Kerrygä qarağanda, Çeçnä suğışı häm demokratiädän çitläşkän aftokratiägä taba alıp barğan soñğı politik adımnar mäsäläsendä Russiäne azıraq tänqitlär digän näticägä kilgän bulırğa tieşlär. Associated Press agentlığı da ike kandidatnıñ Russiägä mönäsäbäte häm Putin-Buş mönäsäbätlärenä qağılıp bolay dip xäbär itä. 30-nçe Sintäberdä Kerry belän Buş arasında bulğan debatlarda, Kerry Putin terrorğa qarşı köräş digän bulıp zarur bulğannan artıq adımnar atlıy dip Russiädäge vazğiätkä borçıluın belderde. Buş isä minem Putin belän şäxsi mönäsäbätlärem anıñ kürgän çaraları xaqında söyläşergä mömkinlek birä. Min Putingä demkratiäneñ faydalı yaqların iskä töşeräm dip äytep, yomışağıraq tonda söyläde. Putin dä, Buş ta Ğıraq mäsäläsendä fiker ayırmalıqları bulsa da, terrorğa qarşı köräştä xezmättäşlek itülären häm üzara mönäsäbätlärneñ yaxşı buluın belderälär. Çınnan da Russiä AQŞnıñ Üzäk Aziädän torıp Afğanistanda operatsiä alı baruına qarşı çıqmadı. Üz nävbätendä Washington Rusisäneñ Çeçnä suğışında keşe xoquqların bozuına küz yoma. Putin İyün ayında Üzäk Aziägä vizitı vaqıtında Buşnıñ Ğıraqtan qurqınıç bar ide digän raslauın quätläp, Qazaxstandağı summitta Russiä, Sadam Xösäin rejimı AQŞta häm anıñ çit illärdäge qorılmalarına höcüm itärgä äzerlänä digän küzläv mäğlümätlären Washingtonğa citkerde dip belderde. Ul şulay uq Buşnı Ğıraqta suğış başlauda ğäyeplävçe opponentlarına töbäp, alarnıñ moña moral xaqı yuq . Alar Yugoslaviägä qarata şundıy uq säyäsät alıp bardılar dip Buşnı yaqlap çıqqan ide. Putin monda elekke prezident demokrat Klinton çorında NATOnıñ Yujoslaviäne bombalauın küz aldında tottı. Putin Düzämbedä yasaşan çığışında AQŞta prezident saylaularında kemne yaqlauın açıq itep äytmäsä dä, işaräse açıq buldı. Carniegie Mäskäv Üzäge politik küzätüçese Maşa Lipman, Putin yäşerengän işarä cibärde, läkin, ul bik ük yaxşı yäşerenmägän ide dip belderde.

Färit İdelle, Praga.
XS
SM
MD
LG