Ğiraq Milli Ğaskärlär baş fatirına bügen höcüm yasaldı. Reuters mäğlümat agentlığı Ğiraq saqlanu ministrlığınıñ matbuğat wäkile süzlärenä tayanıp, älege höcümneñ Bağdadtan 40 çaqrım çaması yıraqlıqta al-Muşahida digän cirdä bulğanın rasladı. 4 keşe hälak bulğan, 80gä yaqını yaralanğan. Bağdadtan 100 çaqrım yıraqlıqta Ramadi şähärendä amerikan köçläre ğısyançılarğa qarşı xärbi çaraların köçäytte.
CARE isemle xalıqara yardäm agentlığınıñ Ğiraqtağı bülekçäse başlığı yarım ğiraqlı yarım britan xatın-qızı Margaret Hassan totıq itep alınğan dip xäbär itelde. Britaniä tışqı eşlär ministrı bu uñaydan borçılu belderde. Margaret Hassan Ğiraqta 30 yılğa yaqın eşlägän. Londonda säfärdä bulğan Berläşkän Millätlär Oyışması general sekretare Kofi Annan, Ğiraqta ğısyançılarğa qarşı xärbi çaralarda bik saq bulırğa kiräk, Ğiraqta xäzer ike suğış bara, dip belderde: "Sez Ğiraq xalqın üzegezgä qaratır öçen köräş alıp barasız, ber ük waqıtta köç qullanunı da tuqtatırğa tırışasız. Şunıñ öçen sez ber yulı keşelärne dä üzegezgä tartırğa häm iminlekne dä buldırırğa tieşsez, bu eştä saq bulırğa kiräk," dide Kofi Annan. Annan bu süzlärne Britaniä tışqı eşlär ministrı Jack Straw belän berlektä ütkärgän matbuğat oçraşuında äytte. Londonda xäzerge waqıtta Ğiraqtağı Britan ğaskärlären ilneñ köç qullanu däwam itkän töbäklärenä küçerü mäs'äläse tikşerelä. Straw süzlärenä qarağanda xökümät moña qarşı tügel.
