Rusiä bäysez profsoyuzları assotsiatsiäse mäğlümatlarına qarağanda, çärşämbe könne byudjet ölkäsendä eşläwçelärneñ protest räweştä eş taşlawında 1 millionnan alıp 3 millionğa qädär keşe qatnaşqan. Ul Rusiäneñ barlıq diärlek töbäklärendä ütte. Tatarstan profsoyuzları federatsiäse öndäre Tat''yana Vodop''yanova eş taşlawnıñ säbäplären añlata.Tatarstan Rusiä külämendä ütüçe bu çarada qatnaşmadı. Yäğni Respublikadağı byudjet xezmätkärläre, bolar dürt tarmaq- mädäniät, sälämätlek, mäğärif häm sotsial'' ölkälär, uramnarğa çığıp öndämälär qıçqırmadılar. Anıñ urınına, Qazannıñ Xezmät yortında, bu profsoyuz federatsiäseneñ ştabı sanala, Respublika citäkçeläre qatnaşında profsoyuz aktivı cıyılışın ütkärdelär. Respublikanıñ här rayonınnan kilgän wäkillärneñ çığış-sorawlarına vitse-premyer Zilä Wälieva, mädäniät, finans ministrları urınbasarları Rämil Wäliev, Gennadi Şişkin, Qazan şähär xakimiäte wäkilläre cawap birde. Tatarstanda eş taşlaw- zabastovka ütmäweneñ säbäbe – Rusiä citäkçelärennän ayırmalı bularaq, tatarstannıqılar profsoyuz liderları belän yışraq oçraşalar, alarnıñ taläp-üteneçlärenä kübräk qolaq salalar ikän. Ä ul üteneçlär digäne, älege dä bayağı, änderi babay tayağı digändäy, şul ber inde- xezmät xaqı. Profsoyuzlar anı tübän dilär. Häm, kitap tele belän äytkändä indeksizatsiä, ä ğadiräk äytkändä ipi xaqı arttımı – xezmät xaqında arttırırğa kiräk. Yäki fatir öçen tüläw kütäreldeme- xezmät xaqında kübräk tülägez. Byudjet digänne dä yañadan qarağız. Häm, xökümät wäkilläre äytüenä qarağanda,qarıylar da ikän. Tatarstanda eş taşlaw bulmawnıñ töp säbäbe, Tatarstan citäkçelege kiläse yılnıñ ginwarınnan byudjet ölkäsendä eşläwçelärneñ xezmät xaqların 20 protsentqa kütärergä qarar qılğan. Ä bu zur ciñü dip sanıylar profsoyuz citäkçeläre. Başqa töbäklärdä monısı da yuq dilär. Läkin bu ğına mäs’äläne xäl itmi. Byudjettan xezmät xaqı aluçılarnıñ başqa problemaları da citärlek. Biektaw rayonı mäğärif xezmätkärläre profsoyuzı citäkçese Färidä Sayaxova şul xaqta söyli.İnde yañadan çärşämbedä ütkän profsoyuz aktivistları cıyınına qaytıyq. Äytkänebezçä, Tatarstan citäkçelege profsoyuz liderları belän gel elemtädä tora. Bu elemtälärneñ näticäse dä kürenä. Mäsälän, respublikada östämä kompensatsiä tüläwläre saqlanaçaq, tarif stavkaları buyınça 25 protsentlı östämä dä qalaçaq. Respublika byudjetında, byudjet xezmätkärlären kiläse yılda kurort-yallarğa cibärer öçen 35 million rubl'' aqça da qaralğan. Älbättä, bolar böten problemalarnı da xäl itmider. Läkin yurğanıña qarap ayağıñnı suzasıñ, dilär bit. Şulay itep, Rusiädä byudjettan xezmät xaqı aluçılar zabastovkağa çıqqan waqıtta, Tatarstandağılar eşlekle kiñäşmä ütkärü belän çiklänälär.
Räfis Cämdixan.
