Accessibility links

Кайнар хәбәр

Tatarstan deputatları töbäk citäkçelären bilgeläwne xuplıy


Comğa könne respublika Däwlät Şurasınıñ däwlät tözeleşe häm cirle üzidarä komitetınıñ utırışı uzdı. Älege utırışta komissiäse kergän deputatlar Rusiä prezidentı Vladimir Putinnıñ soñğı täqdimnärenä mönäsäbätlären belderergä tieş ide. Şuña da, deputatlarnıñ cıyılıp söyläşüe bu yulı ayıruça iğtibar üzägendä buldı. Tatar-inform agentlığı xäbär itülärenä qarağanda, komitet utırışında şaqtıy qızu bäxäslär barğan. Deputat Gennadiy Mamontov älege täqdimnärne tulısınça yaqlasa, komissiäneñ räis urınbasarı Flera Ziätdinovağa, mäsälän, cirle citäkçelärne yañaça saylawda bu çara waqıtlıça ğına kertelüe oşağan. Ä menä ike märtäbä Rusiä prezidentı täqdim itkän nämzätne kire qaqqan cirle qanun çığaru cıyılışın taratırğa kiräklege belän Flera Ziätdinova kileşep betmi. Bu oçraqta kileşterü komissiäsen tözergä kiräk, dip sanıy ul. Deputat Aleksandr Ştanin isä, Putinnıñ täqdimnärenä qarşı çığıp, alarnı Rusiä Konstitutsiäsenä täñgäl kilmäwe xaqında äytkän. Läkin komissiä äğzäläreneñ kübese Ştanin belän teläktäşlek beldermägän. Şulay itep, Tatarstan Däwlät Şurasınıñ däwlät tözeleşe häm cirle üzidarä komissiäse Rusiä prezidentı täqdimnären xuplağan häm alarnı sessiädä qararğa täqdim itkän.

Deputatlar bäxäsläşkän arada, ber törkem Tatarstan wäkilläre kürşe Başqortstanda buldı. 22 oktäber könne respublikanıñ premyer-ministrı urınbasarı Zilä Wälieva, Yazuçılar berlege räise Foat Ğalimullin, şağir Rinat Xaris Ufada ütä torğan yazuçı Mostay Kärimneñ tuğan könenä bağışlanğan çaralarda qatnaştı. Şuşı uq könne Qazannıñ yılğa texnikumında älege uqu yortınıñ 100 yıllığı bäyräm itelde. Ä Qazan däwlät pedagogiä universitetında Rusiäneñ törle töbäklärennän kilgän belgeçlär uqıtuçılarnı äzerläwne kamilläşterü turında kiñäşläşte. Şulay uq comğa könne başqalada çirattağı zur kibet açıldı. Bäxetle gipermarketında kibetlär genä tügel, ä aşap-eçü urınnarı, xätta sport-kafe da bar.

Narkotiklarğa qarşı xezmätneñ respublika idäräse xäbär itkänçä, Qazanda narkotik matdälär yasala torğan yäşeren laboratoriä tabılğan. Ul şähärneñ ber tuberkulez xastaxanäsendä urnaşqan bulğan. Narkotiklarnı älege xastaxanädä däwalanuçı yasap yatqan. Narkokontrol’ xezmätkärläre tarafınnan añarda 155 gramm mäk salamı tabılğan. Elek öre şähärlärneñ genä bäläse bulğan narkotiklar böten respublika buylap tarala bara. Mäsälän, şuşı könnärdä genä Alabuğa şähärendä yäşäwçe Tacikstannan kilgän keşedä 940 gramm geroin tabıla. Ğomumän, çit il watandaşları tarafınnan Tatarstanda 2004 yılnıñ 9 ayında ğına da 222 cinayät eşlängän, dip xäbär itte respublikanıñ pasport-viza idäräse citäkçese İldar Xalitov.

Gölnaz İlgizär

XS
SM
MD
LG