Accessibility links

Кайнар хәбәр

Prezident saylawları köne yaqınlaşu belän Ukrainada ictimaği-säyäsi kierenkelek arta bara


Ukrainada prezident saylawlarına ber atna waqıt qalıp bara häm şul kön yaqınlaşu belän anda ictimaği-säyäsi kierenkelek küzgä kürenep arta. Oppozitsiä xakimiatne prezidentlıq yarışında qatnaşqan bäysez nämzätlärgä qarşı "terror" kampaniäse başlap cibärüdä, alarğa azmı-küpme yağımlıraq möğämälä kürsätkän mäğlümat çaraların, ayırım alğanda 5-nçe telekanalnı yabarğa tırışuda ğäyepli. Anda eşläwçelär xätta, xakimiatneñ şuşı omtılışına qarşı buluın belderep turıdan-turı efirğa çığu yulın sayladı.

Ukraina prezidentı itep saylanu öçen köräşüçelär şaqtıy bulsa da, oppozitsiäneñ töp nämzäte bulıp "Bezneñ Ukraina" berläşmäsen citäklägän Viktor Yuçenko sanala. Anıñ saylawaldı kampaniäsen azmı-küpme uñay itep bar ildä barı tik ber genä telekanal - millioner häm deputat Petro Poroçenkonıñ 5-nçe kanalı ğına yaqtırtıp kilde. Şuşı eşmäkär oppozitsiäneñ töp finans yaqlawçısı da bulıp tora. Xakimiatneñ prezidentlıqqa çığarğan nämzäte, premyer-ministr Viktor Yanukoviç tirälege oppozitsiäneñ mäğlümat çaralarına çığu yullarına kirtä quyu maqsatında başta mäxkämä qararı belän "5-nçe kanal"nıñ litsenziäsen alırğa tırışıp qaradı. Xäzer inde başqa ber ısul sınala - Petro Poroçenko yala yağuda ğäyeplänä häm anıñ eşen qarağan mäxkämädän, cinayät eşe açılu säbäple Poroçenkonıñ bar mal-mölkäten, şul isäptän "5-nçe kanal" eşen tuñdırunı taläp itälär. Telekanalda eşläwçelär, yala yağu ğäyepläwläre şuşı stansiäne yabu öçen genä, säyäsi maqsatlarda uylap çığarılğan dip isäpli häm moña qarşılığın belderep alar çärşämbe kiçen tamaşaçılarğa turıdan-turı möräcäğät itärgä buldı.

Audio, Roman Skrypin

Ğädäti yañalıqlar çığarılışı urınına efirğa üzläre çıqqan telekanal xezmätkärläre, saylawlarğa berniçä genä kön qalğanda şuşı kanalnı yabu tırışlığın, xakimiatneñ Ukraina xalqın ildäge xällär turında döres mäğlümat aludan mäxrüm itüe dip bäyäli. "5-nçe kanal" ber yıl eçendä tamaşaçılar sanın biş märtäbä arttırğan ide, gärçä soñğı aylarda ul xakimiat yağınnan yasalğan köçle basım astında buldı. Qayber möhim töbäklärdä şikle qanuni säbäplärgä nigezlänep anıñ litsenziäläre alındı. Fiker beleşü näticälärenä qarağanda, Yanukoviç häm Yuçenko prezidentlıq yarışında ber-bersennän qalışmıy. Läkin Yanukoviç, premyer-ministr häm xakimiat nämzäte bularaq, Ukraina mäğlümat çaralarında şaqtıy kiñ häm uñay yaqtırtıla. Viktor Yuçenko kampaniäse isä iğtibar üzägennän çittä qala, aña urın tabılğan oçraqta da yaqtırtu ğädättä tiskäre bäyälämälär belän genä kürenä. Yanukoviçneñ saylawaldı eşlären citäklägän Stepan Havriş, xakimiat nämzäteneñ "5-nçe kanal" tiräsendäge ığı-zığığa qatnaşı bulmawın belderä.

Audio, Stepan Havriş

"Prezident urını öçen köräşkän premyer-ministr Yanukoviçneñ "5-nçe kanal" mäs''äläsenä bernindi dä qatnaşı yuq" di Havriş. Läkin anıñ töp köndäşe, oppozitsiä nämzäte Viktor Yuçenko başqaçaraq uylıy, xakimiattän bäysez mäğlümat çarasın yabu tırışlığı artında Ukraina xökümäte häm Yanukoviç tora, biredä dä, "Azatlıq" radiosınıñ ukrainça tapşıruları, Radio Era, başqa mäğlümat çaraları oçrağındağı kebek ük, yabu öçen uydırma säbäplär uylap çığarıla dip belderä.

Audio, Viktor Yuçenko

Comğa irtän "5-nçe kanal" äle üz tapşıruların alıp bara ide, ämma anıñ xezmätkärläre mäxkämä qararınıñ qayçan ğämälgä kerüe xaqında berni dä belmägän xäldä qala birä.

Kärim Kamal
XS
SM
MD
LG