Bu atna mädäni xäbärlärgä bay buldı. 29 oktäberdä Ğ.Qamal isemendäge tatar däwlät akademiä teatrı üzeneñ sezonın K.Tinçurinnıñ ”Zäñgär şäl” spektakle belän açıp cibärde. Ä bıyıl yaña p'yesa buyınça uzdırılğan bäygedä Gran-Pri bülägen yaulağan Zölfät Xäkimneñ “Telsez küke” p'yesasınıñ premyerası 10 noyäberdä säxnäläşterelä. Bu spektakl'ne tağın 11, 12 noyäberdä dä qararğa mömkin bulaçaq. Xämdünä Timerğaliewa üzeneñ yubiley kiçäsen Ğ.Tuqay isemendäge filarmoniäneñ Konsertlar zalında uzdırdı. Bu kiçädä anıñ tuğan yağı Başqortstannan da bik küp artistlar qatnaştı. 30 oktäberdä şimbä könne Uniks konsertlar zalına Rämil Mindiar üz tamaşasın cıysa, 31 oktäberdä bu zalnıñ säxnäsennän Başqortstanda yäşäp icat itüçe populyar cırlar avtorı, Yärmäkäy rayonı mädäni üzäge bülege mödire Räis Xannanovnıñ cırların başqaruçı cırçılar Xäniä Färxi, Näfqat Nigmatullin, Rezeda Şäräfiewa, Azat Timerşäyex, Göldaniä Xäyrullina çığışların alarnıñ üz tamaşaçısı yaratıp qabul itte. 1 noyäber könne tanılğan mäşhür kompozitor Sara Sadıyqovanıñ tuğan köne. Qazanda bıyıl bu waqiğağa bağışlap Qazan pedagogika universitetınıñ muzıka fakul'tetında “Sara Sadıyqova däresläre” isemle muzıkal' çaralar siklı açıldı. Bu “däreslär” fakul'tetnıñ muzıka qoralları kafedrası professorı Räğdä Xalitovnıñ citäkçelegendä başlanıp kitte häm bu “däreslär” barışında tatar cämäğätçelege, mädäniät häm sänğät wäkilläre Qazan şähäreneñ tatar ziratında cirlängän Sara Sadıyqovanıñ qäberenä çäçäklär saldılar. Düşämbe könne Kärim Tinçurin isemendäge komediä häm drama teatrında Başqortstannıñ xalıq geroe Salawat Yulaevqa bağışlanğan kiçä uza. Ufadan bu kiçädä qatnaşırğa zur törkem cämäğät eşlekleläre , sänğät'kärlär, ğalimnär kilde.
Мälikä Basıyr, Qazan.
