Düşämbe kiçendä Qazanğa Salawat Yulaev kilde. Şul isemendäge bilgele xokkey komandası tügel, ä başqort xalqınıñ milli qaharmanı Salawat Yulaev üze Tatarstan başqalasında bulğan kebek tä'sir qaldı. Kärim Tinçurin isemendäge teatr binasında Salawat Yulaevnıñ tuuına 250 yıl tuluına bağışlanğan kiçägä tamaşaçılar da bik küp kilgän ide. Tatarstan Salawat belän qızıqsına, milli azatlıq köräşe tarixına da ber kem dä bitaraf tügel. Pugaçev ğäskärlären dä küpçelekne başqortlar, tatarlar, çuaş, mari, udmurtlar häm başqa İdel, Ural xalıqları täşkil itte. Kiçägä Ufadan kilgän tarixçı, ğalimnär Viktor Sidorov, Miras İdelbaevlar Salawatnıñ şäxsi sıyfatına ğına tügel, millätneñ köräşenä iğtibar ittelär.
Älbättä, Başqortstannan kilgän sänğätkärlär Näzifä Qadırova, Wäli Xämzin, Flürä Kildiärova çığışları qazanlılarğa bik oşadı. Tatarstan isemennän isä Robert Miñnullin, Mirfatıx Zäkiev, şulay uq Qazannıñ başqort avtonomiäse räise Firdäwes Bäşirova, Başqortstanda tuıp, xäzer tatar sänäğäte yoldızı bulıp üskän Zilä Sönğätullina, Röstäm Malikov çığış yasadılar.
Kiçädän soñ başqort Qorıltayı räise Äxmät Söläymanov Azatlıq radiosına tatar belän başqort xalqına bergä oçraşıp, tatu yäşärgä kiräk, şulay ğına bez üzebezneñ möstäqillegebezne saqlap qala alaçaqbız, bu bezneñ Qazanğa kilüebezneñ töp maqsatı, dip äytte.
Al'bina Zäynulla
