Uzğan xäbärlärdä Qazanda “Xäter burıçı“ xäyriä aksiäse başlanuı turında söyli başlağan idek. Çärşämbe könne, 3 noyäberdä, Qazannıñ Ciñü parkı yanında, şuşı aksiädä qatnaşuçılar- Tön'yak Kavkazdağı xärbi operatsiälärdä häläk bulğan xärbilärneñ tol xatınnarı, balaları cıyıldı. Yoşkar-Oladan, Çabaqsardan, Sember, Penza häm başqa İdel-Ural töbäge ölkälärennän tol xatınnar häm häläk bulğan xärbilärneñ balaları häm ata-anaları öçen xäyriä aksiäsen Tatarstan xökümäte, şähär xakimiäte ütkärdelär. Biregä Rusiä Eçke eşlär ministrlığınıñ Eçke ğäskärlär okrugı citäkçese urınbasarı Vladimir Zelenenki, şulay uq okrugnıñ xärbi orkestrı da kilgän ide. Tınıç waqıtta qaynar noqtada häläk bulğan soldatlarnıñ yaqınnarın yuatuğa şähärdäge säwdä-sänäğät oyışmaları matdi yärdäm kürsätte.
Sişämbe könne Qazan däwlät universitetınıñ 200 yıllıq yubileyına bağışlanğan matbuğat oçraşuı buldı. Anda universitetnıñ rektorı Magsüm Säläxov yubileyğa bağışlanğan tözü-tözekländerü eşläre, federal' maqsatlı programmada qaralğan aqçalarğa. tulısınça başqarıluın belderde. Federal' üzäktän birelgän 1 milliard 300 meñ sumğa universitetnıñ töp tarixi binası tulısınça üzgärtep qorılğan anıñ qaraltı-quraları, işek alları tärtipkä salınğan. Jurnalistika häm sotsiologiä fakul'tetları öçen yaña bina tözelgän. Anı tantanalı açu 10 noyäbergä bilgelängän. Bu tantana belän universitetnıñ 200 yıllığına bağışlanğan çaralar başlana disäñ dä bula. Çaralarnıñ iñ tantanalıları 15 noyäberdän başlana häm 3 kön däwam itäçäk. Xalıqara konferensiä häm universitet ğilmi şurasınıñ tantanalı utırışı farazlana. Bu tantanalarğa 600 yaqın şäräfle qunaqlar çaqırılğan. Alar arasında Rusiä prezidentı Vladimir Putin, Rusiä xökümäte räise Mixail Fradkov, Federatsiä şurası Sergey Mironov häm Däwlät Duması räise Sergey Grıyzlov bar ikän. Tantanalar belän Qazan universitetın tözekländerü kiñäytü eşläre tämamlanmıy. Qazannıñ meñ ellığına universitetnıñ torğınlıq yıllarında pıyala häm betonnan salınğan ike biek binası cılıtılaçaq ikän. Şulay uq ximiä fakul'tetı binasın häm tulay toraqlarnı da tözätäçäklär inşalla.
Sişämbe könne Qazannıñ Arça ziratında urnaşqan Yäroslawskix Çudotvorsev xramınnan Qazan üzägendä urnaşqan Petropavlov soborına Qazan İzge Ana ikonasın küçerü yolası ütkärelde. Älege ikonada 20 ğasır başında yuğalğan töp nösxäseneñ küçermäse ikän. Mäğlüm ki Qazan İzge Ana ikonasınıñ Vatikanda saqlanğan tağın ber küçermäse patriarx Aleksey ikençegä 28 avgustta Mäskäwdä tapşırılğan ide. Qazan İzge Ana ikonasınıñ töp nösxäse 1612 yılda Mäskäwne polyaklardan azat itüdä bulışqan digän riwayät bar. Sişämbe könne Qazanda ütkärelgän yola da Mäskäwneñ häm Rusiäneñ polyaklardan azat itelüeneñ çirattağı yıllığına bağışlana ikän.
Şuşı könnärdä Tatarstan xristiannarı tağın ber zur dini yola ütkärdelär. Qazanğa İzrail'dän izge knäginä Yılisawetanıñ izge söyaklären alıp kildelär. Qazanda izge söyäklärne qulda kütärep barıp krestnıy xod yasadılar, berniçä çirkäwdä tön saqlaw yolası ütkärdelär. Knäginä Yılisaweta urıs patşası imperator Aleksandr ikençeneñ bişençe ulınıñ xatını bulğan. Rusiädä izge eşläre belän tanılğan. 1918 yılda bol'şeviklar tarafınnan cäzalap üterelgän. Soñraq izgeläşterelgän, söyäkläre wäsıätendä äytelgänçä İerusalimğa iltep quyılğan. İzge knäginä Yılisawetanıñ izge söyakläre Qazanda 3 kön buldı häm sişämbe kiçendä İjauğa ozotıldı. Rusiä şähärläre buylap ütkärelä torğan bu yolanı Mäskäw Patriarxatı häm Çit illärdäge Urıs Çirkäwe provaslavlarnıñ berläşüe yulında möhim ber etap bulır dip ütkärä ikän. Yunıs Ätnäle.
