Accessibility links

Кайнар хәбәр

Rusiä xoquq yaqlawçıları baş prokuror Vladimir Ustinov täqdimenä qarşı


3 noyäberdä Mäskäwdä Bäysez pressa üzäge xoquq yaqlawçı “Memorial” oyışması wäkile Aleksandr Çerkasov häm Xel'sinki töreke xoquq yaqlawçı oyışma jitäkçese Lyudmila Alekseewa qatnaşında matbuğat oçraşuı ütkärde.

Matbuğat oçraşuı, “Artqa, uzğanğa. Rusiäneñ general prokurorı täqdime Rusiäne zur terror yıllarına kire qaytara” dip atalğan ide

Matbuğat oçraşuın oyıştıruçılar jurnalistlarğa Rusiä prezidentı isemenä yazılğan baş prokuror çığışı nigezendä barlıqqa kilgän möräcäğätlären dä belderdelär. Memorial oyışmasınıñ Vladimir Putin isemenä yazılğan möräcäğätendä mondıy yullar bar. “Däwlät Dumasında çığış yasağan baş prokuror Vladimir Ustinov terrorçılar belän köräştä alarnıñ tuğannarın da qulğa alunı täqdim itep kenä qalmıy, terrorçılarnıñ eşen mäxkämädä qarağan waqıtta ğadiläşterelgän mäxkämä tikşerüen dä taläp itä.. Anıñ bu täğdime SSSR waqıtında Üzäk başqarma komitetnıñ 1934 yılnıñ 8 iyünendä qabul itkän,qararı belän awazdaş. Ul waqıtta da xalıq doşmannarınıñ tuğannarın sörgengä cibärü qaralğan ide. Ä inde 1934 yılnıñ 1 dekaberendä Sergey Kirov üterelgännän soñ qabul itelgän terrorğa qarşı köräş qararında da Watannı satuçılarnıñ tuğannarı turında färmän kertelgän ide. Rusiä konstitutsiäse nigezendä baş prokuror Rusiä Federasiäseneñ qanunçılığın saqlawçı bulırğa tieş. İlneñ baş prokurorın bilgeläw häm eşennän azat itü dä sezneñ qaramaqta. Bezneñ fikergä kilgändä Sez Stalin qanunnarın qaytarunı täqdim itkän baş prokurorğa qarata ike törle qarar çığara alasız. Alarnıñ berse Ustinovqa eşennän kitüne täqdim itü, ikençese -täğdim itmäw. Bu qararnıñ ikese dä bilgele däräcädä Rusiäneñ kiläçägen açıqlayaçaq. Saylap alu sezneñ qulda “dip yazılğan ul möräcäğättä.

Terrorçılarnıñ tuğannarın qulğa alu Çeçnyada inde küptän ğämälgä kertelgän dide xoquq yaqlawçı “Memorial” oyışması wäkile Aleksandr Çerkasov. Ul şulay uq Patruşev tarafınnan beldergän 80 terrorçı xatın qıznıñ Rusiägä yul totuı xaqında da äytep uzdı. Ä inde yalğış, terrorçılar dip fotoräsemnäre taratılğan, İnguşetiädä eşlägän vraçlar aldında ğafu ütensälär dä, Beslandağı waqiğalardan soñ bu vraçlarnıñ fotoräsemnäre terrorçılar digän baş astında yañadan Rusiädä genä tügel, Ukrainağa da taratılğan dip xäbär itte Aleksandr Çerkasov.

Mäskäwneñ Xel'sinki törkeme xoquq yaqlawçı oyışması räise Lyudmila Alekseewa üzeneñ ni öçen bu matbuğat konferensiäsendä qatnaşuın byuelderde. Häm äle Rusiäneñ prezidentı qarşındağı keşe xoquqları yaqlaw komissiäse äğzäse bularaq, komissiä tarafınnan prezident isemenä yazılğan möräcäğätne uqıdı. Anda mondıy süzlär bar ide «Rusiädä keşe xoquqları bozıluğa üzeneñ bäyäsen birergä tieşle, Rusiä Federatsiäse prezidentı qarşındağı keşe xoquqları komissiäse Prezidentqa xoquq yaqlawçı oyışmalarnıñ taläplärenä qolaq salıp, General prokurornı eşennän azat itärgä çaqıra» dielgän ul möräcäğättä..

Näzifä Kärimova, “Azatlıq” radiosı, Mäskäw

XS
SM
MD
LG