Ğiraq ğısyançılarınıñ Ansar al-Sunna törkeme Ğiraq xärbi köçläreneñ ber wäkilen üterüen häm bu tasmanı internetqa quyuların xäbär itte. Hussein Şunun isemle bu yuğarı xärbi wäkil Mosul şähärendä amerikan köçlärenä ğısyançılarğa qarşı çaralar oyıştırırğa yardäm itkän bulğan. Ğiraq eçke eşlär ministrlığı mäğlümatlärenä qarağanda, çığışı belän Livannan bulğan ber amerikan Bağdadtağı Livan şirkäte binasınnan urlanğan. Totıq aluçılarnıñ kem bulğanı älegä bilgele tügel. Bügen Bağdadta eşkä barışlıy Neft ministrlığı räsmie üterelgän. Bağdad hawa alanına barğan yulda amerikan maşinaları yanında şartlaw bulğan. 7 ğiraqlı yaralanğan dip xäbär itelä. Macarstannıñ yaña premyer-ministrı Ferenç Gürçanı, 300 macar xärbie kiläse yılnıñ mart ayı azağına qadär Ğiraqtan çığarılaçaq, dip belderde. Budapeştta xärbi tantana waqıtında yasağan çığışında Gürçani, Macarstannıñ burıçı – ğaskärlärne Ğiraqta ğinwar ayında ütäçäk saylawlarğa qadär qaldıru, dide. Macarstan ğaskärlärne Ğiraqqa terrorğa qarşı koalisiäneñ ber äğzase bularaq cibärde, ämma şunnan birle xökümät xalıq häm oppozisiäneñ basımı astında qaldı. Hollandiä xökümäte comğa könne Ğiraqqa 1350 xärbien cibärüne xäbär itte. Hollandiä ğaskärläre dä mart ayına qadär çığarılaçaq.
