Accessibility links

Кайнар хәбәр

George Bush qabat Quşma Ştatlar prezidentı bulıp saylandı


Şulay itep, Bush tağın 4 yılğa Quşma Ştatlar prezidentı bulıp saylandı. Ohio ştatında ciñä almayaçağın añlağannan soñ çärşämbedä John Kerry üzeneñ ciñelüen tanıdı.

Audio (John Kerry): "Bügen min prezident Bush belän söyläşep anı häm Loranı ciñüläre belän qotladım."

Bilgele bulğança, Quşma Ştatlarda prezident ilküläm cıyılğan tawışlar belän tügel, ä maxsus saylawçılar kollegiäse tarafınnan bilgelänä. Här ştatnıñ, anda yäşägän xalıq sanına qarap, kollegiädä bilgele sanda tawışı bar. Äytik, Vermont, Montana kebek keçkenä ştatlarnıñ 3 tawışı bulsa, iñ zur ştat - Californianıñ 55 tawışı bar. Bu tawışlar ul ştatta ciñep çıqqan namzätkä birelä. Prezident bulu öçen kiemndä 270 tawış alırğa kiräk. Aldan kötelgänçä, Buş - respublikan sanalğan, Kerry – demokrat ştatlarda ciñep, berse 254, ikençese – 252 tawış aldı. Prezident bulu öçen citmägän 20 tawışnı soñğı Ohio ştatı birä ide. Ul ştatta Bush 100 meñläp tawışqa kübräk cıydı. Kerrynıñ bar ömete – berniçä könnän sanalaçaq "şartlı" tawışlar ide. Kerry, ul tawışlar Ohioda ciñü öçen citärlek tügel digän näticägä kilde:

Audio (John Kerry): "Ciñü öçen şans bulsa, min çigenmäs idem. Läkin şul açıqlandı, bar şartlı tawışlar sanalsa da, alar Ohioda ciñü öçen citärlek tügel. Şuña kürä bez bu saylawlarnı ciñä almıybız."

Tağın ike säğättän George Bush çığış yasap Amerika xalqına räxmäten belderde:

Audio (George Bush): "Amerika süzen äytte, watandaşlarım miña beldergän ışanıç aldında baş iäm. Bu ışanıç belän bar Amerika xalqına xezmät itü wazifası kilä. Bu wazifanı ütäw öçen qulımnan kilgänen eşliäçäkmen."

Şulay itep bu saylawlarda da Amerika ike qotıpqa bülende. 58 million saylawçı respublikan öçen, 55 millionı – demokrat öçen tawış birde. Fiker beleşülärgä qarağanda Bush saylawçıları anıñ ğömüm qimmätlärgä, şul isäptän öçen abort, ber-cenesle nikax, qoral yörtü mäsäläsenä bulğan qaraşın iskä alıp tawış birgän. Cato institutı belgeçe Patrick Basham süzlärençä, moña östäp küp kenä amerikannar iminlek mäsäläsendä Bushqa kübräk ışana:

Audio (Patrick Basham): "Terror-iminlek mäsäläse bu saylawlarda iğtibar üzägendä buldı. Küp kenä keşedä Bushnıñ bu ölkädä eş itüenä rizasızlıq arta. Läkin berük waqıtta alar yögänne Kerryğa tapşırırğa telämi, yılğa urtasında atlarnı alıştırudan qurqa."

Texas Universitetı professorı Bruce Buchanan Bushnıñ uñışın anıñ xöcümçän saylawaldı kampaniäse belän añlata. Anıñ süzlärençä Bush Ğiraqtağı awırlıqlar, Äbü Ğraib cancalına qaramastan, Kerry''ğa xöcüm itü strategiäsen saylap, axır çiktä uñışqa ireşte.

-Ali Gilmi
XS
SM
MD
LG