Accessibility links

Кайнар хәбәр

Tomski ölkäseneñ "Ğiffät tutaş"ları dip Älmirä Sadıyqova häm Raliä Äbdelmanova tabıldı


Iñ çibär, ädäple, itağatle, aqıllı häm saf tatar qızları dip 22 yäşlek Älmirä Sadıykova häm 14 yäşlek Raliä Äbdelmanova tabıldı. Alar küptän tügel genä Tomskida ütkärelgän “Ğiffät tutaş” bäygeseneñ ciñüçeläre buldılar. Älege bäyge Tomskinıñ tatar mädäniät üzäge häm ölkä mädäniät idaräse tarafınnan oyıştırıldı. Ximayäçılar yärdäme dä buldı. Qatnaşuçılar Tomskinıñ tatar yäşläre oyışmasınnan, şähär mäktäplärennän häm ölkäneñ Abatay, Äwştä, Yaña İslambul, Barabinqa awıllarınnan buldılar.

Konkurs barışında 13 yäştän 25 yäşkäçä qızlar cirle tatarlar tarixın, möselman mädäniäte nigezlären, milli ğoref-ğadätlärebezne ni däräcädä belülären, qul eşlärendä, aş-su äzerläwdä, yort eşlären alıp baruda häm cır-biyudä ostalıqların kürsättelär. Qızlarnıñ uñğanlığın sostavında Tomski häm Novosibirski şähärläreneñ milli mädäni moxtariätläre räisläre, tatar häm ğaräp tele belgeçläre, milli kiem äzerläw ostaları bulğan märtäbäle jyuri bäyäläde.

“Ğiffät tutaş” konkursı tatar mädäniät üzäge urnaşqan Kärimbay yortında ütte häm ul küp kenä tamaşaçılarnı cälep itte. Tomski çibärläreneñ yarışların qararğa 200 gä yaqın keşe kilgän ide.

Bäyge tatar muzıkası astında tübändäge şiğri yullar belän başlanıp kitte.

Üze çaya, üze tıynaq – Ber süz äytsän , qızara. Kemnär genä ğaşıyk tügel Bezneñ matur qızlarğa.

Kürkäm başlanğıç, matur tamaşa räweşendä däwam itte. Muzıka astında milli matur kiemnärdä qızlar säxnägä kütäreldelär. Ütä dulqınlansalar da, quyılğan sorawlarğa alar eçtälekle häm tirän mäğnäle cawaplar birdelär. Tatar tarixın, din qanunnarın, milli ğoref-ğadätlärne yaxşı belülären kürsättelär qızlar. Aldan äzerläp alıp kilgän çigü - bäyläw eşläre , ağaçtan häm käğäzdän eşlängän qul eşläre alarnıñ sälätläreneñ kürsätkeçe ide. Abatay awılınan kilgän Zölfiä Säyfmölekovanıñ mäçet maketı, Äwştä awılınnan kilgän Ruzana Äminovanıñ çigü ürnäkläre jyuri tarafınnan yuğarı bäyälände. Yana İslambul awılınnan Saniä Välitovanıñ matur itep tatar cırların başqaruı, Tomskinıñ 10-nçe mäktäbendä uquçı Nadiä Krivovyazneñ därtle biyue tamaşıçılarnı soqlandırırlıq ide.

Näticädä ike nomenatsiädä - 13 yäştän 20 gäçä häm 20 yäştän 25 käçä nomenatsiälärdä cinüçelär bilgelände. Berençe nomenatsiädä 14 yäşlek Raliä Abdulmanova, ikençe nomenatsiädä 22 yäşlek Älmirä Sadıykova berençe urınnarnı yauladılar. Alar berençe däräcäle diplomnar, “Ğiffät tutaş” dip yazılğan tasmalar häm zinnätle şärıq şarfları belän büläkländelär. Konkursta qatnaşqan 13 qıznıñ berse dä törle däräcädäge diplomsız häm büläksez qalmadı.

Konkurs tämamlanğannan soñ tatar mädäniät uzäge citäkçese Yusup efände Abdraşitov häm anıñ cämäğäte – konkursnıñ ssenarien tözüçe Gäuhär xanım konkursta qatnaşqan qızlarğa, alarnıñ äti-änilärenä, äbi-babaylarına tirän räxmätlären belderdelär, kiläçäktä dä mondıy çaralarda qatnaşırğa çaqırdılar.

Soñınnan qızlar tamaşaçılarnı üzläre äzerlägän milli rizıqlar belän sıyladılar. Xalıq ta taralırğa aşıqmadı. Ölkänräklär tatar moñnarı astında aralaştı, yäşlär diskotekada biede. Barsı da çaradan qänäğät idelär.

Oyıştıruçılar da quyılğan maqsatlarına ireştelär kebek. Alarnıñ maqsatları älbättä zurdan. Yäşlärdä milli xis tärbiäläw, tuğan telgä, mädäniätkä, tarixqa qızıqsınu uyatu, öyränü teläge tudıru. Älege konkurs alarnıñ şuşı yunäleştäge eşlärendä ber adım buldı disäk yalğış bulmas.

Saniä Mirxaleewa. Azatlıq radiosı. Omski

XS
SM
MD
LG