Accessibility links

Кайнар хәбәр

Tatnet: Balıq bistäse awıl balaları internet kilüen kötä


İtar-Tass agentlığı xäbär ikänçä, Rusiä elemtä ministrı Leonid Reyman, telekommunikatsiä ölkäse, iqtisatnıñ başqa tarmaqlarına qarağanda tizräk üsä, digän belderü yasadı. Rusiä Elemtä ministrı, barlıq töbäklärne internetqa totaştırırğa häm awıllarnı telefonlaştırırğa wäğdä itä. Ul şulay uq, 2005 yıl axırına qädär, Rusiädä 10 meñ poçta bülege internetqa totaştırılaçaq, dip beldergän bulğan Rusiä elemtä ministrı Leonid Reyman. Ä Tatarstan elemtä ministrlığı birgän mäğlümatlarğa qarağanda, respublikada 100 meñläp keşeneñ öyendä, eşendä internetqa çığu mömkinlege bar. Qazanda, başqa zur şähärlärdä, İnternet–kafelar eşläp tora, mobil telefon aşa da elektron xatlarnı uqıp alıp bula. Ämma yıraq awıllardağı keşelär öçen, zamança elemtä çaraları turında xıyallanırğa qına qala. Bu atnada xäbärçebez Röstäm İsxakov Balıq bistäse rayonınıñ ber awılında yäşlär arasında keçkenä soraştıru ütkärgän. Elemtä ministrlığı, awıllarda da internet bar dip belderülär yasap tora, ämma bu çınnan da şulay mikän. Awıl yäşläre internetnıñ närsä ikänen, anı nindi mömkinleklär birüen beläme? Yäşlärgä şuşı sorawnı birdek. Yäşlär, internetnı belep betermibez, bezneñ mäktäptä internet yuq, dip cawap birde. Rayon üzägendä internet bar, ämma awılda kilep citkänçe ällä küpme waqıt ütärgä mömkin, dip söyläde alar.

Bu rayonda internet belän xälneñ torışın beler öçen, Elemtä ministrlığına şaltırattıq. Ministrlıq süzçese birgän mäğlümatlarğa qarağanda, Balıq bistäse rayon üzägendä İnternetqa totaştırılğan ike üzäk bar, şunıñ belän bergä, rayon üzägendä poçta bülegendä, internet kertelgän 2 kompyuter bar. İnternet häm başqa kompyuter çeltäre belän şulay itep, rayon üzägendä häm anıñ yanında yäşi torğan awıl keşeläre genä qullana ala. Bez söyläşkän mäktäp balaları üzäktän yıraq tora, ämma global çeltärdän, dönya cämäğätlegennän çittä qalırğa telämi. Qayçan bu rayonda awıl mäktäpläre internetqa totaştırılaçaq ikän, dip «Tattelecom» şirkätenä çıltırattıq. Şirkätneñ süzçese, Gölnara Däwlätşina awıl balalarına ozaq kötärgä qalmadı, dip cawap birde. Belgänegezçä, «Tattelecom» şirkäte Mäğärif ministrlığı belän berlektä, mäktäplärne internetqa totaştıru programmasın alıp bara. Balıq bistäse rayonına kilgändä, «Tattelcom» şirkäte 2004 betkänçe, 22 mäktäpne global çeltärgä yalğarğa wäğdä itä. Bu rayonda barlığı 32 mäktäp eşläp kilä, qalğan 10 mäktäpkä internet 2005 yılda kilergä tieş.

Tatnet yañalıqları: tatarlar.tk digän säxifädä Klaypeda tatarlarınıñ saytları oyışıp kilä. Älegä anda mäğlümat bik äz. Saytnıñ iğänäçese - Rusiäneñ Litvadağı ilçelege dip yazılğan. Säxifädä Klaypeda tatarlar oyışmasınıñ qayçan, niçek oyışuı turında yazılğan, räsemnär häm bank isäp-xisabı sannarı yazılğan. Şuşı könnärdä genä, www.bulyak.kazan.ru digän sayt päydä buldı. Säxifäneñ yañalıqlar bülegendä, säxifä 1nçe noyäberdä eşli başladı, dip yazılğan. Bu - qotlawlar häm büläklär xezmäteneñ internet säxifäse. Älegä ul urıs telendä genä, anıñ tatarça häm inglizçä bülekläre qaralğan, ämma – eşlämi. Büläklär xezmäte citäkçese Lilia Safina, şuşında, qunaqlar kitabında, saytnıñ tatarça bülege dä bulaçaq, dip wäğdä itä. Şuşı bulyak.kazan.ru saytı aşa, Qazandağı tuğannarnı, duslarığıznı internet aşa zakaz birep qotlarğa täqdim itelä. www.bulyak.kazan.ru

Biredä, çın büläklärne tapşıru turında süz barsa, «Bulmas.ru» säxifäse aşa tatarça virtual täbriklämä cibärep bula. Säxifädä «Kotlyıq» digän bülek yaña ğına eşli eşli başladı. www.bulmas.ru. Üzegezgä Qazannan äyber alıp cibärergä teläsägez, kibet.net digän säxifägä kerä alasız. Anda tatarça muzıka cıyıntıqları satıla.

Bikä Timerova.

XS
SM
MD
LG