Accessibility links

Кайнар хәбәр

Tatar studentları bäyräm itä!


Qazan däwlät universitetınıñ 200 yıllıq yubiley qısalarında bik küp çaralar ütä. Läkin alarnıñ kübese rus telendä. Ni qızğanıç, Tatarstan başqalasındağı universitetta uquçı tatar studentları bäyräm tamaşaların tulısınça üz ana tellärendä tıñlawdan mäxrüm. Tantanada ällä nigä ber “İsänmesez”, “Saubulığız”, “Räxmät” süzlären işetep bula anısı. Tik, Allağa şöker, tatar filologiäse häm tarixı fakul'tetı bar, yäşilär, bäyräm itälär. Häm tatarça! Tatar bülege oyışuğa 60 häm Tatar filologiäse häm tarix fakul'tetınıñ 15 yıllığına bağışlanğan tantana moña açıq misal buldı.

Bäyrämdä başınnan axırına qädär cılılıq, yuğarı rux xökem sörde. Kilgän qunaqlarnıñ, tamaşaçılarnıñ şat yözläre, zal tulı xalıq bulu söyeneçle küreneş ide. Alar barısı da bik birelep tatfak studentlarınıñ çığışların, konsert nomerların qaradılar. Tamaşaçılar arasında yazuçılar, şağirlär, däwlät häm cämäğät eşlekleläre bar ide.

Tänäfestä hawa sularğa dip UNİKSnıñ işek töbenä çıqqan idem, anda “Tatar radiosı” nıñ baş möxärrire Almaz Mirğayazovnı oçrattım. Ul da älege tatar filologiäse fakul'tetın tämamlağan ikän. “Bez uqığanda könçığış tellär fakul'tetı ide. Min üzemneñ kurstaşlarım belän küreştem. Äyterseñ bernärsä dä üzgärmägän, menä-menä auditoriälärgä kerep däres däwam itär kebek. Şuşı fakul'tetta uquıma çiksez şatmın. Tormışta totqan urınım belän min üzem uqığan uqu yortıma olı räxmätemne citkeräm. Universitetta tanışqan duslarım ğömerlek duslarım bulıp qalsınnar ide digän teläktä qalam!”

Konsertta fakul'tetnıñ bügenge studentları belän bergä, universitetnı berniçä yıl elek tämamlawçılar da çığış yasadılar.



Tatar filologiäse häm tarixı fakul’tetına citäkçese İskändär Ğıyläcev fakul'tet bäyräme uñayınnan fikerläre belän urtaqlaşa Audio

Tatar telen üsterüdä KDU tatar filologiäse häm tarixı fakul'tetınıñ role äytep betergesez zur. Bu berençe çiratta anda uqıtqan uqıtuçılarnıñ tırışlığı. Respublikanıñ massaküläm mäğlümat çaralarında eşläwçe tatar jurnalistlarınıñ kübese älege fakul'tettat çıqqannar. Yaña ğasır teleradiokompaniäseneñ jurnalistı, konsertlar alıp baruçı bularaq tanılğan İldar Qıyämov tatfakta uqıtqan uqıtuçılarına olı räxmätlären äytep ütte..

Tatarstannıñ xalıq artistı, Qazan däwlät pedagogika universitetı dotsentı Miñğol Galiev ta bäyräm uñayınnan üz uy-fikerläre belän urtaqlaşırğa aşıqtı. Bezne borçığan tel-moñ mä’sälälärenä nıqlı fikeren citkerde:“Min bu fakul'tet yäşläre belän tığız elemtädä toram. Alarnı cır sänğäte serlärenä öyrätäm. Ber ük waqıtta ana telebezneñ telenä, moñına mäxäbbät tärbiälärgä tırışam. Kiläçäktä xalqıbızğa, millätebezgä ürnäk bulırday qızlar-ullar bulırlar dip ışanam. 60 yıllıq tarixı bulğan tatar filologiäse häm tarixı fakul'tetı talantlı, tanılğan şäxeslärne tärbiäläde. Şuña da bez yaratqan tatfagıbız belän ğorurlanabız. Bäyrämdä däwlät eşleklelärebezneñ çip – çista itep tatarça söyläwlärenä soqlanıp tuymaslıq, bu çın mäğnäsendä fän üseşe. Läkin şunı da äytäsem kilä, tatfaknıñ kiläçäge şulwaqıtta ömetle bulaçaq, qayçaq ilebez citäkçelärebez, prezidentıbız tatar telen, moñın, millätne saqlawğa yöz belän borılsalar!”

Tatfak bäyräme ütte dä kitte. Läkin ul ezsez ütmäde. Älege çarada küplär öçen uylanırlıq nigez, ğibrät alırlıq misal bulmadı tügel.

Läkin şunsı qızıq, yazuçı Tufan Miñnullin: "Min gel tatarça ğına söylim, çönki rusça naçar beläm", - dip, tağın ber qat telebezgä tuğrılığın, hättä berqayçan da tatar telendä çığış yasap qaramağan KDU rektorı Mäğzüm Sälähov kebek tel ölkäsendä "batırlıq kürsätüçelär" kiläçäktä bulırmı, yuqmı?! Ansı ber Xodayğa mäğlüm!

Röstäm İsxakov

XS
SM
MD
LG