Accessibility links

Кайнар хәбәр

Fälluca höcüme däwam itä, anda xäzer ğisyançılardan arınu alıp barıla


Ber atnağa suzılğan uram suğışlarınnan soñ amerikan ğäskäriläre Fälluca şähären nigezdä yawlap aluı xaqında belderä. Anda qarşılıq kürsätüne tulısınça beterü öçen äle tağın berniçä kön kiräk bulaçaq di höcüm belän citäkçelek itkän amerikan generalı John Sattler. Şuña kürä düşämbedä dä Fällucada suğışlar däwam itte.

Audio, atışlar

Ğiraqnıñ üzägendäge Fällucanı ğisyançılardan çistartu düşämbedä dä däwam itte. Şähärneñ ayırım urınnarında qaçıp yatqan şul baş kütärüçe köçlärgä qarşı tuplar, awır artilleriä häm hawa höcümnäre dä qullanıldı. Amerikan yağı äytüençä, töp iğtibar düşämbe könne Fällucanıñ könyağında tabılğan cir astı qorılmaların yuq itügä birelgän, anda törle binalarnı üzara totaştırğan cir astı yullarında qorallar häm suğış kiräk-yaraqları tabılğan. Amerikan ğäskäriläre genä tügel, Ğiraq xökümäte köçläre dä qatnaşqan şuşı höcümne citäkläwçe Quşma Ştatlar generalı John Sattler süzlärenä qarağanda, şähärneñ ayırım urınnarındağı qarşılıq noqtaların tulısınça beterü öçen tağın berniçä kön kiräk bulaçaq. Yäkşämbe könne ul, bezneñ ğäskärlär Fällucanı arqılığa buyğa yörep çıqtı, xäzer inde Fällucanı ğisyançılardan azat itü xaqında äytep bula dip belderde. Ämma höcümdä qatnaşqan ğadi amerikan ğäskäriläre, şähär uramnarı äle haman da zur qurqınıç tudıra häm anda irekle yörü mömkin tügel, ğisyançılar höcümenä duçar bulu bik ixtimal dip zarlana. Monı general Sattler üze dä tanıy, ul, xäzerge bäreleşlärneñ nigezdä Fällucanıñ könyağında baruın äytsä dä, şähärneñ tönyağında da atışlar çığuın belderä. Ä Fällucanıñ ul öleşe amerikan köçläre tarafınnan äle ber atna elek ük yawlap alınğan ide.

Audio, John Sattler

"Bez tönyaqtan alıp bar şähär buylap anıñ könyağına qädär ğisyançılardan arınu eşen alıp barabız. Yäğni bez inde suğışıp ütkän öleşlärgä dä qaytıp andağı här binanı tikşerep, anıñ iminlegen tä''min itäbez" di general Sattler. Şulay itep ul, Fällucadağı ğäskäri operatsiäneñ xäzer uram suğışlarınnan ayırım binalarnı doşmannan çistartuğa, qarşılıq kürsätü urınnarın bastıruğa küçä baruın äytä. Quşma Ştatlar Fällucada barlığı 1200-läp ğisyançını yuq itüe xaqında belderä, amerikan ğäskäriläre arasındağı yuğaltular isä yäkşämbe kiçenä qädär 38 üle häm 275-läp yaralı ide. Moñardan tış, Ğiraq xökümäte köçlärennän dä 6 ğäskäri hälak bulğan. Şuşı sannar uñayınnan qayber belgeçlärdä, Fällucada urnaşqan häm törle terror ğämälläre qıluda şiklänelgän ğisyançılarnıñ küpmese şähärdän qaçıp qotılğan ikän digän soraw tua. Londonda çığa torğan "Jane''s Defense Weekly" basması xezmätkäre İan Kemp:

Audio, İan Kemp

"Bu çınnan da citdi ber mäs''älä bulaçaq, di Kemp, Ğiraq ğisyançılarınıñ öleşçä Fällucadan qaçıp kitä alu ixtimalı turında. "Quşma Ştatlarnıñ, kemneñ dä bulsa qaçuına kirtä quyu maqsatında şähärne tieşle räweştä çolğap aluı öçen berniçä ay waqıtı bar ide. Ägär dä ğisyançılarnıñ küpläp qaçuı açıqlansa, bu çolğanış alay uq qısan bulmağan digän süz" di "Jane''s Defense Weekly" basmasınnan İan Kemp. Kemp şulay uq, Fällucadağı suğışlar, ğisyançılarğa qarşı soñğısı bulmayaçaq dip isäpli häm Ğiraqnıñ başqa töbäklärendä dä barğan bäreleşlärne misal itep kiterä. Düşämbedä genä dä andıy bäreleşlär Ramadi, Mosul häm Baquba şähärlärendä buldı dip xäbär itelde. Latifiä häm Samarra şähärlärendä isä Ğiraq xakimiateneñ iminlek köçläre ğomumän, üz xärbi kiemnärendä yörüdän baş tartqan, çönki anda kön sayın diärlek alarğa höcümnär yasala ikän.

Kärim Kamal
XS
SM
MD
LG