Atna başındağı xäbärlärebezdä Rusiä Federatsiäse Kommunistlar partiäseneñ Tatarstan bülegendäge bülenü, ayırılu xaqında äytep uzğan idek, xörmätle tıñlawçılarıbız. Çärşämbe könne Tatarstan kommunistlar partiäseneñ yaña citäkçelege, kilep tuğan wäzğıätne añlatu niäte belän, Qazandağı Lenin muzeenda matbuğat oçraşuı ütkärde. “Şütke kürmägez- Älhäm süräsen” digän di ber mulla abzıy kommunistlar xakimiätkä kilgäç. Şunıñ kebek kommunistlarnıñ xäle bik citdi ikän. Rusiä Dumasında un yıl deputat bulıp torğan Aleksandr Saliy, biş yıl deputatlıq itkän Näsimä Stolyarova, Tatarstan prezidentı saylawlarında layıqlı itep qatnaşuğa ireşkän Robert Sadıyqovlar 13 noyäberdä uzdırılğan kommunistlar cıyılışında partiädän çığarılğannar. Ägärdä älege şäxeslärneñ partiä isemlegennän Tatarstan Däwlät Şurasına saylanuğa häm anda kommunistlar fraksiäse buldıruğa ireşülären isäpkä alsan, äytkändäy-“yeğılıp kitärsen”. Şuña kürä kommunistlar älege wäzğıätkä täfsille añlatma birergä mäcbür. Matbuğat oçraşuın alıp barğan yaña citäkçe Xafiz Mirğalimov tarqalu, bülenü tarixınıñ küptän Rusiä prezidentı saylawları aldınnan başlanğan. Anıñ äytüençä prezident apparatı kommunistlar partiäsen köçsezländerü eşlären başlağan. Zyuganovqa al'ternativ citäkçelek Tixonov tarmağı barlıqqa kiterelgän. Alar uzğan cäy al'ternativ syezd ütkärep Zyuganovnı citäkçelektän çitläşterergä mataşqannar. Älege syezdda Tatarstan kommunistları bülege citäkçeläre dä qatnaşqannar. Läkin soñıraq Rusiäneñ yustitsiä ministrlığı Zyuganov tarafdarları ütkärgän KPRF neñ 10 syezdın legitim dip tanığan. Şunnan soñ Tatarstan bülegendä tartqalaş kitkän. Nindider legitim bulmağan syezda qatnaşıp, xättä Tixonov partiäseneñ citäkçelegenä saylanıp ölgergän Saliy, Stolyarovalar belän nişlärgä? Alarnı bälki aqılğa kilerlär dip başta citäkçelektän öleşçä genä çitlätkännär. Şul waqıtta Kommunistlar partiäseneñ Tatarstan bülege citäkçese wazifasın waqıtlıça ütäwçe itep bilgelängän Xafiz Mirğalimov alarnı axırğaça yaqlawın yäşermi äytä. Çönki alarnıñ abruyı belän isäpläşmi bulmıy. Xättä partiädän çığarılğaçta Däwlät Şurasındağı asılında Aleksandr Saliy, Näsimä Stolyarova, Robert Sadıyqov torğan fraksiäse kommunistlar fraksiäse dip tanıylar. Gärçä bu ikele-mikele pozitsiä Tatarstan kommunistları oyışmasındağı tarqalışnıñ säbäbe bulıp torsa da. Partiädän çığarıluçılar inde Xafiz Mirgalimovqa- “bez sine üzeñne fraksiädän çığarabız” dip kisätep quyğannar. Tatarstan kommunistlarınıñ yaña citäkçese dä Tatarstan Däwlät Şurasına kommunistlar isemlegennän saylanğan deputat bit äle.Yunıs Ätnäle.
