Belarustağı Amerika Quşma Ştatları ilçelege, Minskidağı xökümättän bäysez amerikan oyışmasınıñ yabıluına protest belderde. Xezmättäşlek Berlege dip isemlängän älege oyışma Belarusta 1997nçe yıldan birle eşläp kilgän bulğan. Ul finanslağan proektlar arasında – AİDS, alkogol häm narkotiklarğa qarşı çaralar. Oyışmanı tıyu säbäpläre iğlan itelmi.
İlçelek mäğlümatlärenä qarağanda, älege oyışma Belarustağı qanunnarnı bozmağan. Düşämbe könne Yevropa Berlege illäre tışqı eşlär ministrlarına täqdim iteläçäk belderü ölgesendä Belarus räsmiläreneñ qayberlären Yevropağa kertmäw häm Berlek belän Belarus arasında mönäsäbätlärne çikläw turında süz bara häm prezident Aleksandr Lukaşenka'ğa säyäsäten üzgärtergä çaqıru bar. Bolay itep Yevropa Berlege ğadel bulmağan saylawlar häm Lukaşenkanıñ 3nçe möddätkä prezident itep saylana aluı turında uzğan referendumğa protest belderä.
