«Ukrainada kem ciñär ikän? Andağı xällär närsä belän betär ikän?» tatar forumçıları şul sorawnı quyıp, fiker alışu säxifälärendä söyläşte. Saylawlar aldınnan, qayber forumçılar, «bez Rusiä yaqlağan Prezidentnı yaqlıybız», dip fikerläre belän urtaqlaşsa, soñınnan, Kuşma, Yuşenko isemnärendä törki tamırlar ezli başladı. Mäsälän, berse Yuşenko isemeneñ kilep çığışın, «yüeşlängän», «yäşen» häm «yäş» digän süzlär belän bäyli. Kievtağı waqiğalarnı küzätep barğan arada, forumçılarnıñ fikere dä üzgärä. Alar Yüşenkoğa teläktäşlek kürsätä başladı.
Bu söyläşülärne tatforum.at.tt saytında kürep buldı. «Tatarskaya gazeta»nıñ internet forumında Ukraina tiräsendäge söyläşü ozın häm zur bäxäskä äylände. Anda fiker alışuçı keşelär, Kiev uramnarındağı şikelle, bäxäskä kerde, tege yäki bu säyäsätçene yaqlap, fiker alıştı. Söyläşü uram cıyınnarı başlanğan waqıtta barlıqqa kilde, ul 26 noyäbergä qädär kiñäyep bardı.Axırda Yuşenko häm Yanukoviç yaqlı forumçılar, urtaq fikergä kilmiçä, açulanışıp bette. Ukraindağı uram cıyınnarı äle däwam itä, şuña forumçılar bu temağa alğa taba da qaytırlar. Ä şuşı forumda qatnaşqan Sabircan äfände, temanıñ başqa yağına iğtibarnı yünältä. Xällär niçek kenä barmasa da, «böten dönya mäğlümat çarları, üzebezneñ «Mäydan» süzen qabatlıy, anıñ öçen, ukrainnarğa räxmät» dip yazıp çıqtı.
Latin grafikası tiräsendäge söyläşülär dä çeltärdä bu atnada da däwam itte. Tatforum.at.tt säxifädä Tatarça ğına yazışa torğan ber bülek eşli. Älege forumnıñ idäräçese, Millätçe äfände, başqa monda kirill xärefläre belän yazmağız, latinça ğına yazışabız digän yazu qaldırıp kitkän. Anıñ belän başqa forumçılar da kileşä.Başqa ber keşe anda, internetta qanunıñ latin xäreflären, ul bulmasa – törek xäreflären, ansı da bulmasa – ingliz xäreflären, maxsus tamğalı inalifnı qullanırğa çaqıra.
Bu söyläşü tatforum.at.tt säxifäsendä bardı.News.tatar.info digän internet-dayjestlar säxifäsendä, Kommersant gäzitendä basılğan soraştıru näticäläre basılğan. «Sezgä, tatarlarğa, barıberme?» digän baş astındağı yazmada, bilgele tatarlarnıñ latin grafikası mäs’äläsendä fikerläre urın alğan. Cırçı Rinat İbrahimov, latinğa küçü kiräk dip äytä, Cırçı Alsu Safina – kiräk tügel, dip belderä. Tatarstan säyäsätçeläre kübesençä latin yaqlı bulsa, Mäskäw tatarları – qarşı bulıp çığa. Älege soraştıru bastırıp çığarğan «Tatarnews» portalında, şuşı yazma xaqında fiker alışu başlandı. Andağı keşelärneñ kübese, latin yaqlı bulıp çıqtı.
Bikä Timerova.
