«Berdäm Rusiä» firqäseneñ Tatarstan bülegendä struktur üzgäreşlär bulmayaçaq. Mäskäwdä ütkän firqä qorıltayında üzgärtep qorular bulsa da, alar cirle bülekçälärgä qağılmayaçaq, dip xäbär itte firqäneñ süzçese.
Xäzer qorıltayğa barğan Tatarstan wäkilläre Qazanğa qaytıp, qorıltayda äytelğan süzlär turında uylana. Tatarstan Prezidentı xäzer xakimiät firqäseneñ räistäşe bulmasa da, respublikanıñ wäkilläre yuğarı citäkçelek arasında qalqan. Firqäneñ General Şurasında Färit Möxämmätşin, Oleg Morozov, Färidä Gaynullina häm Marat Mağdeyev ta bar. Qorıltayda Tatarstannan 39 keşe qatnaşqan, delegatlar arasında şähär, rayon citäkçeläre, firqäneñ başqarma komitet xezmätkärläre, «Berdäm Rusiä»neñ yäşlär oyışmaları wäkilläre bulğan.Firqäneñ süzçese äytüenä qarağanda, firqäneñ qorıltayı Qazanda ütkän cirle konferensiä belän awazdaş, kierenke ruxta ütkän. Rusiä xökümäten tänqitläwçelär küp bulğan. Noyäber urtasında, Tatarstanda äytelgän süzlär Mäskäwgä dä barıp citkän. Belgänegezçä, cirle säyäsi konferensiädä, Tatarstan Prezidentı cirle qanun çığaru cıyılışların quyıp taratuçı qanunnı tänqitläp çıqqan ide. Häm Tatarstan deputatları älege qanunğa üz tözätmälären äzerläde. Alar Dumada komitetlarında qaraldı inde, ämma qabul itelmäde. Ä xakimiät firqäseneñ Tatarstan bülegendä, bezne, respublikanıñ fikere firqä citäkçelege tarafınnan iskä alındı, dip ışandırırğa tırıştılar. Dälil itep alar, firqä citäkçese itep saylanğan Boris Grızlov notığında , töbäklärneñ fikere isäpkä alınırğa tieş, digän cömläneñ yañğırlawın kiterälär. Qorıltayda, Tatarstannan ber wäkil çığış yasarğa tieş bulğan, ämma, aña çirat citmäw säbäple, Çallıdağı «Berdäm Rusiä» wäkilenä Tatarstan pozitsiäsen yañğıratırğa turı kilmägän.
Qorıltayda, Rusiä xökümätenä küp tänqit belderü belän bergä, firqä äğzälärenä citäkçe urınnar birü turında täqdim yañğırağan. Qanun nigezendä ministrlarğa da Firqä äğzäläre bulırğa röxsät itelä, şuña, «Berdäm Rusiä» firqäse citäkçeläre däräcäle urınnarda üz firqädäşlären kürergä telär ide. Bu, reformalar ütäşe öçen cawaplı, wazifaları kiñ bulğan tarafdarnı buldıru öçen eşlänä, dip añlatalar alar. Xakimiätkä ütep kerü başlanğıçı uñayınnan, Tatarstanda citäkçelek arasında üzgäreşlär bulamı yuq, digän soraw, älegä cawapsız qaldı.Bikä Timerova.
