Accessibility links

Tatarstan parlamentı räise urınbasarı "ikençe Çeçnya" belän yanağanmı?


2 dekaberdä Tatarstan Däwlät Şurasın Prezidium utırışı bulıp ütte. Anı parlament räise Färit Möxämmätşin alıp bardı. Ğädättägeçä, utırış aldınnan, räis soñğı säyäsi xällärgä añlatmaların birde. Gazeta.ru digän basma, Däwlät Şurası räise urınbasarı Yuriy Kamaltdinov «İkençe Çeçnyanı kürergä teläsägez, parlamentlarnı quyıp taratu öçen tawış biregez», dip äytä, dip yazıp çıqtı. Süz töbäk citäkçelären östän bilgeläw häm şuşı qanunğa tözätmälär turında bara. Belgänegezçä, 1 dekaberdä Duma deputatları mäğlüm qanunnı ikençe uqılışta qabul itte. Tatarstan täqdim itkän tözätmälär qabul itelmäde. Bäysez deputat Vladimir Rıjkov, Dumada bäxäsläşkän waqıtta, Tatarstan parlamentı wäkilläre ikençe Çeçnä belän yanıy, dip dälil kitergän bulgan ikän. Bu süzlärne Parlament räise urınbasarı Yuriy Qamaladinov äytkän, dip yazıp çıqtı Gazeta.ru. 2 dekaberdä bulğan Prezidium utırışında, Färit Möxämättäşin, bu süzlärgä añlatma soradı. Tikşerä torğaç, «İkençe Çeçnyanı kürergä teläsägez, cirle parlamentlarnı quyıp taratu öçen tawış biregez», digän belderüne kommunist Aleksandr Saliynıñ yasawı açıqlanğan. Ämma kommunist deputatnıñ kisken belderüläre, Tatarstannıñ räsmi pozitsiäse bula almıy. Tatarstan däwlät Şurasınıñ aldağı utırış köne bilgelängännän soñ, Parlament räise, belderü yasadı. Ämma ul töbäk citäkçeläreneñ wazifalarınnan kitüe turında tügel, ä Ukrainadağı säyäsi kierenkelekkä qarata üz fikeren äytergä buldı. «Tatar-inform» agentlığı xäbär itkänçä, Färit Möxämmätşin bolay beldergän bulğan: «Ukraina unitar däwlät, Qırım utrawı ğına avtonomiä statusına iä, cirle citäkçelärne östän bilgeläw häm alarnıñ Prezidentqa ğına buysınuları, bügenge xälgä, küpmeder tä’sir itkänder. Nıqlı xakimiät vertikale dä, Ukrainanı säyäsi krizistan qotqara almadı», digän bulğan Tatarstan Parlamentı räise.

Bikä Timerova
XS
SM
MD
LG