Accessibility links

Кайнар хәбәр

Tatarstan cırçıları – Ufada


Tanılğan tatar cırçıları Zöfär Bilalov belän Zäynäp Färxetdinowa Başqortstan başqalasında çirattağı ğastrol'lären başlap cibärde. Bu yulı alar Ufa tamaşaçılarına küçtänäçkä üzläreneñ «Qabatlanmas bu ğömer» dip isemlängän yaña proğrammasın alıp kilde. Tamaşalar Ufanıñ dürt mädäniät sarayında ütä. Här köngä biletlarnıñ aldan uq satılıp betüye Tatarstan qunaqların Ufada niçek yaratuların açıq kürsätep tora. Başqortstan başqalasında çığışları waqıtında Zöfär Bilalov belän Zäynäp Färxetdinowanı respubliktağı telewidenie häm radio qanalları jurnalistları da tik totmıy. Alar populyar cırçılarnıñ säxnädäge çığışların da yaza, äñgämälär dä oyıştıra. Şuşı uq proğramma belän Tatarstan qunaqları Başqortstannıñ qayber rayonnarında da çığış yasarğa äzerlänä. Kiläse atnada Qazannan tağın küp kenä tatar cırçıları, şul isäptän İlham Şakirov, Zöhrä Säxäbiewa, Xämdünä Timerğäliewa häm başqalar da duslıq konsertlarında qatnaşu öçen kilä. Ufada «Master» dip atalğan studiä häm prodüserlıq üzäge oyıştırıluğa 15 yıl tulu uñayınnan yübiley konsertları ütäçäk. Älege üzäkkä keräşen tatarı Griğoriy Baytiräqov citäkçelek itä. Anıñ süzlärençä, yübiley tamaşaları bik matur ütärgä tieş. Çönki anda ike tuğandaş respubliknıñ sänğät yoldızları qatnaşa. Alarnıñ kübese şuşı «Master» studiäsendä üzläreneñ cır älbomnarın çığarğan.
XS
SM
MD
LG