Accessibility links

Кайнар хәбәр

Başqortstannıñ tatar awıllarında tatarça yazu kürmässeñ


Başqortstannıñ Şaran rayonında tatar tele häm ädäbiätı uqıtuçılarınıñ respublik seminär – kiñäşmäse bulıp ütte. Yıl sayın oyıştırıluçı älege cıyınğa bu yulı respublikanıñ 20dän artıq rayonınnan häm ike şähärennän 80 nän artıq tatar tele häm ädäbiätı uqıtuçıları belän berrättän, Ufadağı yuğarı uqu yortlarındağı tanılğan tatar ğalimnäre häm möğallimnäre dä kilde. Şaran rayonında küpçelek xalıqnı tatarlar täşkil itä. Şulay uq biredä çuaşlar, marilar häm urıslar da yäşi. Soñğı yıllarda balalarnı tatar telendä uqıtu kimesä dä, tatar tele nıq kimsetelä dip äytep bulmıy biredä. Şulay da problemnar här urınlağıça monda da citärlek. Kiñäşmägä Ufadan barğan tatar ğalimnäre arasında tanılğan möğallim, filoloğiä fännäre qandidatı Sufiän Safuanov ta bar ide. Anıñ süzlärençä, äle rayonda cämğıse 19 tatar tele kabinetı da bar ikän. Alar zäwıq belän bizälgän, kürgäzmä – metodik äsbaplar da citärlek. Balalarnı tuğan yaqqa söyü ruxında tärbiäläwgä şaqtıy iğtibar birelä. – Ämma küñelne qıra torğan küreneşlär dä bar, – di Sufiän äfände. – Misal öçen, saf tatar awıllarındağı mäktäplärdä dä tatarça yazılğan elenmä yazularnı kürermen dimä. Alar yä urıs telendä, yä başqortça yazılğan. Bu küreneş, älbättä, ber Şaran rayonına ğına xas närsä tügel, ul böten Başqortstandağı ğomum xäl, – di Sufiän Safuanov. (audio) Şaran rayonında tatar uqıtuçılarınıñ respublika seminarında tatar balalarına töple belem birü, alarda tuğan yaqqa häm ana teleñä söyü xisläre tärbiäläw turında süzlär küp bulğan. Respublikanıñ törle töbäklärennän kilgän uqıtuçılar üzlärendä bulğan aldınğı eş täcribäse belän dä urtaqlaşqan. Bu maqtawğa layıq xäl, bilgele. Ämma tatar mäktäplärendä häm, ğomumän, saf tatar awıllarındağı uramnarda tatar telendä elenmä yazular bulmaw, alarda yuğarıdan tik başqort telendä genä yazarğa kürsätmälär birelü tatar balalarında üz ana telenä qarata söyü tärbiäläwgä çınlap ta nigezlek tudırmıydır şul.
XS
SM
MD
LG