İran räsmiläre kiläse atnada Britaniä, Fransiä häm Germaniä wäkilläre belän atom programması turında söyläşülärne yañartaçağın iğlan itte. İrannıñ Yuğarı İminlek Şurası citäkçese Xäsän Rohani süzlärençä, bu söyläşülärgä Xalıqara Atom Energiä İdaräse başlığı Möxämmät Äl-Baradei da çaqırılğan. Bu söyläşülär näticä birmäsä, İran üzeneñ uran bayıtu eşlären yañartu belän kisätä. Quşma Ştatlar İrannı yäşeren räweştä atom qoralı citeşterüdä ğäyepli. Tähran monı kire qağa häm üzeneñ atom programmasın tınıç maqsatlar öçen dip belderä.
