Accessibility links

Кайнар хәбәр

Qazanğa qunaqlar kilä-kitä tora


Qazanda comğa könne YUNESKO tarafınnan oyıştırılğan 3 könlek töbäkara seminarınıñ eşe tämamlandı. Soñğı utırışta cıyılışta qatnaşuçılar başqa illärne dä matdi bulmağan mirasnı saqlaw buyınça YUNESKO konvensiäsenä quşılırğa çaqırdı. Läkin monıñ belän genä eş betmäde. 50gä yaqın ildän kilgän qunaqlar öylärenä qaytıp kitär aldınnan, alarnı rus mädäniäte häm ğöref-ğädätläre belän tanıştırdılar. Şuşı niät belän seminarda qatnaşuçılarnı Qazan çitendä maxsus oyıştırılğan Rus qışı bäyrämenä alıp bardılar. Tatarstanda bu könnärdä YUNESKO cıyılışına kilüçelärdän tış ta çit il qunaqları buldı. 16 dekaberdä Qazanğa Fransiäneñ Rusiädä wäkälätle ilçese kilde. Comğa könne anı häm ilçe belän bergä kilgän fransuz eşmäkärlären respublikanıñ premyer-ministrı Röstäm Miñnexanov qabul itte, dip xäbär itä Tatar-inform agentlığı. Ä menä Tatarstan belän Kiprnıñ profsoyuz wäkilläre xezmättäşlek turında kileşü imzaladı. Şul uq könne Röstäm Miñnexanov respublikanıñ Minzälä rayonı belän tanıştı, Çallı şähärendä buldı. Tatarstannıñ iñ öre şirkätläreneñ berse – KamAZ berläşmäse üzeneñ 35 yıllıq yubileyın bilgeläp ütä. Şuşı datağa bağışlanğan tantanalı çara 17 dekaber könne Çallıda uzdı. Respublikanıñ Tatmedia agentlığında 16-17 dekaber könnärendä Tatarstan mäğlümät çaraları wäkilläre öçen seminar uzdı. Anda Mäskäwdän kilgän belgeçlär qatnaşlığında elektron mäğlümät çaralarınıñ kiläçäge xaqında süz bardı.

Qazanda şähärneñ meñyıllığına äzerlek bara. Bu başqalada alıp barıla torğan tözekländerü eşlärendä genä çağılmıy. Mäsälän, 20-21 dekaber könnärendä respublikanıñ Säwdä-sänäğät palatasında başqalanıñ zur yubileyına bağışlap eşlängän büläk, suvenir ürnäkläre kürgäzmäse ütäçäk. Şulay itep, bäyrämgä kilüçelärgä büläklär inde äzerlänä.

Gölnaz İlgizär

XS
SM
MD
LG