Accessibility links

Кайнар хәбәр

İndus Tahirov: "Latinnan baş tartmayaçaqbız"


Soñğı aralarda Rusiä matbuğat çaralarında tatar telen latinğa qaytaru mäsäläse yañadan iğtibar üzägenä mende. Mäskäwdä näşer itelä torğan gäcit-jurnallarda tağın Tatarstanda kirilda yazarğa telämilär, tatarlarğa latin xärefläre närsägä kiräk, nik alar bar Rusiä xalqı kebek kiril xärefläre belän yazarğa telämi häm başqa şundıyraq mäğnädäge yazmalar, xatlar dönya kürä başladı. Menä Qazan jurnalistı Vera Postnova da qalışmasqa bulğan. Nezavisimaya gazetanıñ 274 sanında ul İz Tatarstana vıjivayut kirillitsu, yäğni, Tatarstannan kiril xäreflären qısrıqlap çığaralar digän mäqälä urnaştırğan. Xäyer, yazmada respublikada kiril xärefläre niçek itep qısrıqlanuı xaqında yazılmağan anısı. Jurnalist anda uquçılarnı Tatarstan Rusiä Konstitutsion mäxkämäseneñ mäğlüm qararına qarşı kilä, dip ışandırırğa tırışa. Monı isbatlaw öçen Mintimer Şäymievnıñ dä, bez latinğa qaytu buyınça eksperimentnı däwam itep, kiräkle mäğlümätne tuplap, ber 5 yıldan soñ yañadan bu sorawğa qaytırbız, digän süzlären dä kiterä. Vera Postnova üzeneñ mäqäläsendä şulay uq küptän tügel genä oyışqan, barısı 63 oyışmanı berläştergän Latin frontı turında da yaza, anıñ möräcäğäte belän tanıştıra. Anda, latinğa qaytunı tıyudan soñ ikençe adım bulıp respublikalarnıñ milli däwlät tellären beterü bulaçaq, bu oçraqta tatar tele bötenläy qanunsız bulıp qalaçaq, digän fiker bar, dip yaza Postnova Nezavisimaya gazetada.

Soñğı aralarda latinğa höcüm nindi säbäptän yañadan aktivlaştı soñ digän soraw belän bez ğalim İndus Tahirovqa möräcäğät ittek. Ul bu xaqta menä nindi fikerdä tora.

Berençedän, bu latinğa küçüne tamırdan yuqqa çığaru öçen. İkençedän, citäkçelärebez dä, bez üzebez dä latinnan baş tartmıybız, eksperimentlar däwam itä, waqıtı citkäç bötenläy dä küçärbez, bälki Rusiä üze dä şuşı latin imlasına küçep qalır, diep äytep kiläbez. Alar monı işetep toralar. Şuña kürä inde, kiläçäktä latinğa küçü mömkinlegen bötenläy beterü maqsatı belän şuşı höcümnär däwam itä. Läkin bez aña qarap, eşne tuqtatmayaçaqbız

İndus Tahirov latinnı yaqlaw eşendä bar keşegä dä berdäm räweştä eş alıp barırğa kiräk, dip sanıy. Şuña kürä, Latin frontınıñ eşen dä ul uñay bäyäli. Bu bezneñ maqsatnıñ urtaqlığın kürsätep toraçaq, di ğalim. Läkin latinnı saqlap qaluda iñ möhim ğämäl bulıp xalıqara mäxkämälärğä möräcäğät itü tora, dip sanıy ul.

Gölnaz İlgizär

XS
SM
MD
LG