Accessibility links

Кайнар хәбәр

Dulqın taşqını dähşätendä zian kürüçelärgä yardäm kürsätü arta, ülüçelär sanı 130 meñnän artıp kitäçäk dip farazlana


Berläşkän Millätlär oyışması mäğlümatına qarağanda, könyaq häm könyaq-könçığış Aziäneñ diñgez yarları duçar bulğan qotoçqıç tabiğät qazasında hälak buluçılar sanı 150 meñne ütep kitä ala, meñlägän keşe äle haman da xäbärsez yuğalğan sanala. Östäwenä, sälämätlek saqlaw oyışmaları xäzer qaza töbäklärendä çığa başlağan yoğışlı çirlärdän ülemnärneñ ikençe dulqını kiläçäk dip kisätä.

Bu bigräk tä iñ zur zian kürgän İndoneziä häm Sri Lanka öçen qurqınıç bulıp tora, anda ülüçelär sanı distälärçä meñ, İndoneziädä inde 100 meñgä yaqınlaşıp kilä. Anda 80 meñnän artıq keşeneñ hälak buluı raslandı, şunnan soñ xökümät, mäyetlär sanawnı alıp bara almawın, sanitariä taläplärennän çığıp mäyetlärne aşığıç töstä cirläwen xäbär itte. Ä älegä üzendä 4 meñnän artıq qorban buluın beldergän Thailanda isä premyer-ministr Taksin Şinawatra, bezneñ ildä çirlär çıqmayaçaq dip belderde, yäkşämbedä ul qaza töbäklärendä bulıp kitte.

Audio, Taksin Şinawatra

"Bez här närsäne yaxşı kontrol itäbez, monı ışandırıp äytä alam. Thailandta çirlär çıqmayaçaq, bu ölkädä eşlärne bez tieşele räweştä alıp barabız. Sälämätlek saqlaw ministrlığı mäyetlär belän eş itüne döres alıp barunı qarap toru häm çirlär çıqmaw maqsatında barısın da eşläw öçen keşelär cibärde" dip belderä Thailand premyer-ministrı. Qaza näticälären açıqlaw häm berençel saqçılıq çaraları kürü belän bergä tsunami dähşätennän zian kürgän illärgä matdi yardäm cıyu eşe dä däwam itä. Berläşkän Millätlär, törle illärneñ xökümätläre inde 2 milliard dollarlıq yardäm wäğdä itte dip belderde. İñ zur öleşne kertüçe bulıp Yaponiä xökümäte tora, ul 500 million dollar wäğdä itte. Quşma Ştatlar bu eşkä 350 million dollar biräçägen äytte. Aqça tuplaw kiläçäktä dä däwam iteler dip kötelä, ämma inde xäzerdän ük berençel aşığıç yardämne qaza töbäklärenä citkerü probleması kütärelä. Misal öçen, İndoneziäneñ Sumatra utrawında isän qalğannar da ülem qurqınıçı aldında tora - alarnıñ xäzer çista eçär suı yuq, alar açlıqtan integä, cäräxätlär aluçılarğa meditsina yardäme kürsätelmi. Dulqın taşqını şähärlärne tulısınça yuwıp töşergän bu töbäkkä yardäm xezmätkärläre soñğı ber-ike köndä genä ütep kerä aldı.

Audio

Utrawnıñ töp şähäre Medanada yardäm yöklären buşatu alıp barıla. Alda iñ awırı - şul yardämne qaza töbägenä citkerü tora, anda yullar, hawa alannarı, portlar, elemtä - barısı da saftan çıqqan xäldä. Azıq-tölek häm su açlıqtan intekkän xalıqqa xärbi boraklar yardämendä hawadan ğına citlkerelä. Atna azağında bu eşkä amerikan xärbiläre dä quşıldı. Sumatra utrawı yarlarına Quşma Ştatlarnıñ oçqıç korabı kilep tuqtadı häm ul xäzer yardäm kürsätü nığıtması bularaq qullanıla. Bu töbäkkä şulay uq İndoneziäneñ dä 4 diñgez fregatı kilep urnaştı.

Kärim Kamal
XS
SM
MD
LG