Yaña yılnıñ başında ütkänenä näticälär yasıylar, anda bulğan iñ möhim waqiğalarnı, istälekle çaralarnı barlıylar. Tatarstanlılar öçen 2004 yıl närsä belän xätergä kerep qalğan soñ? Şuşı xaqta bügen bilgele keşelärneñ fikerläre belän tanışıp kitik äle. Bu xaqta Watanım Tatarstan gäcite soraşqan. Tatarstan prezidentınıñ kiñäşçese Rafail Xäkimov öçen, mäsälän, uzğan yıl Ukrainadağı saylawlarda Viktor Yusçenkonıñ saylanuı belän istä qalğan. Şulay uq Yevropa berlegeneñ kiñäyüen häm Tatarstanda Latin frontı oyışunı da bik möhim waqiğa dip sanıy. Şuşı äytelgän latin frontın oyıştıruçılarnıñ berse – Fändäs Safiullin uzğan yılnıñ iñ qurqınıç waqiğası dip Rusiä Konstitutsion mäxkämäseneñ latin imlasına qarşı çıqqan 16 noyäberdäge qararın sanıy. Tel turında ğına süz barsa, ul qarar belän bezneñ xalıqqa naxaq yala yağıldı. Şuşı yalanı därräw kütärelep alıp attırmasaq, ul bezneñ kiläçäk yazmışıbız öçen çerek nigez bulıp qalırğa mömkin, digän fikerdä tora Fändäs Safiullin. Ä menä respublikanıñ prokurorı Kafil Ämirovqa isä uzğan yıldağı iñ istälekle çaralar bulıp anıñ şäxsi tormışındağı waqiğalar istä qalğan. Ul qızınıñ dissertatsiä yaqlawın, üzenä yaña däräcä häm maqtawlı isem birülären atağan. Cırçı Asaf Wälievnıñ 2004 yıldağı töp xatiräläre dä üzeneñ tormışındağı üzgäreşlär belän bäyle. Ul töp waqiğalar isemlegenä üzeneñ Piramida küñel açu zalında uzğan konsertın häm Mersedes maşinasın satıp alunı kertkän.
Ä ğalim İndus Tahirov isä, bez ildä, il tormışı belän yäşibez. Şuña da, andağı tormış, andağı waqiğalar bezneñ öçen bik möhim häm uzğan yıldağı borçular, problemalar 2005 yılğa da küçälär, dip sanıy. Uzğan yılnıñ iñ istä qalğan waqiğaları dip ul menä närsälärne atıy.
Rusiä külämendä iñ istä qalğan waqiğa bulıp min Beslan faciğäsen atar idem. İlneñ tışqı säyäsätennän – Rusiäneñ Ukrainadağı saylawlarğa tıqşınuı. Bu ike il arasındağı mönäsäbätlärne awırlaştırdı. Ä bit Ukrainda qırım tatarları da yäşi. Tatarstanğa kilgändä, min 2004 yılda Rusiä belän respublika mönäsäbätläreneñ artqa taba baruın iskä alır idemĞalim İndus Tahirov 2004 yılnıñ iñ ähämiätle, möhim waqiğaları dip menä şularnı sanıy.
Gölnaz İlgizär
