Accessibility links

Кайнар хәбәр

New York Times gazetası Putinneñ İllarionovnıñ däräcäsen kimetüe turında nilär yaza?


Russiä prezidentı Putin Düşömbedä kötelmägändä üzeneñ ölkän kiñäşçese Andrey İllarionovnıñ cavaplılığın, däräcäsen kimette. Moña İllarionovnıñ Kreml citäkçelegen tänqitläve häm Rusisäneñ totqan yulı belän kileşmäve säbäp buldı dip uylanıla. Amerikan gazetası Nyu York Taymsta bu xaqta bügen basılğan maqälä "Putin Kremlgä tänqitle mönäsäbät kürsätkän kiñäşçeseneñ däräcäsen kimette " dip atala.

Gazetanıñ yazuınça, Putin färmanında ber nindi dä añlatma birelmiçä, İllarionovnıñ Russiäneñ 8-lär törkeme dip atalğan industriäläre alğa kitkän illär törkemendä ilçe vazıyfasınnan buşatılğan buluı äytelgän. Anıñ urnına Kremlgä küberäk turılıqlı bulğan prezident yardämçelärennän İgor Şuvalov bilgelängän. 43 yäşlek İllarionov 2000-nçe yıldan birle Putinneñ ekonomik kiñäşçese häm soñğı vaqıtlarda Kremlneñ kursın tänqitlävçe şäxes. Kreml dä İllarionovnıñ süzçese dä, älegä ul üzeneñ kiñäşçe portında qala birä dip belderdelär. İllarionov uzğan atnadağı press konferensiäsendä häm Exo Moskvı radiosına birgän intervyusında Russiädäge vaqiğälärgä centekläp tuqtalğan, il tiskäre yünäleştä bara häm öçençe dönya ile xälenä kilü belän täväkkälek itä digän fiker beldergän ide. İlliarionov xökümätne başbaştaqlarça eşlävdä ğäyeplägän , Kremlneñ medianı qısırıqlauın , Yukosnıñ töp milken qulına eläkterüen, politik xakimiätne üzäkläşterüen häm tışqı säyäsäten tänqitlägän ide. Ul Yukosnıñ töp şirkäten qulğa eläkterüen yılnıñ iñ zur xärämläşüe-aldauı dip bäyläde. Xökümätneñ sälämät şirkätkä höcüme häm Kremlneñ nindi şirkätlärgä östenlek birüen kürsäkän işarälär, anıñ finansnı näticäle eşlävçe şirkätlärdän azıraq näticälelärgä yünältüen kürsätä dip belderde İllarionov. Putinneñ gubernator saylauların köçtän çığarıp, alarnı bilgeläv sisemasın kertüe politik yarışnı beterüne añlata. Bu isä torğınlıqqa alıp bara. Putinneñ ekonomik kiñäşçeseneñ süzlärençä, Yukos turındağı räsmi häm yarım räsmi belderülärneñ ber nindi dä ekonomik nigeze yuq. Ul şulay uq AQŞnıñ Texas mäxkämäse xakimınıñ Yukos auksionıñ tuqtatırğa tırışuına yuğarı bäyä birep, xakim Russiägä yaıuzlanuğa birelmäve öçen yardäm itärgä tırıştı dip belderde. İllarionov şulay uq Ukrain saylauçıların, prezident saylaularındağı xärämläşülärgä qarşı protest belderep demonstratsiä ütkärgännäre öçen qotladı. Näticädä Putin yaqlağan Yanukoviç tügel, ä oppozitsiä kandidatı Yuşenko prezident itep saylandı. Ul şulay uq Russiä säyäsmännäreneñ Yanukoviçnı yaqlap çıqqan tupas belderüläre häm eşçänlege, Yuşenkonı yaqlamağan ukrain saylauçıların da aña tauış birergä etärde dip belderde. İllarionovnıñ törle ölkälärdä Russiäneñ räsmi säyäsätenä qapma-qarşı bulğan fiker belderüen Kreml reaksiäsez qaldırmadı. Putin anıñ däräçäsen kimette. Kiläçäktäge pozitsiäse älegä bilgesez. Läkin, Kreml divarlarınnan çittä anı yaqlauçılar bar. Ul intervyu birgändä, Exo Moskvı tıñlauçılar arasında fiker beleşü ütkärde. Alarğa İllarionov xökümättä qalıp, anıñ qararlıran täsir itärgä tırışırğamı, ällä kitärgäme tieş digän sorau quyıldı. Bu fiker beleşü dürt minut dävam itte. 9200-dän küberäk tıñlauçı şaltratqan häm 86 protsentı ul qalırğa tieş digän fiker beldergän.

Färit İdelle. Praga.
XS
SM
MD
LG