Accessibility links

Кайнар хәбәр

Tatar cırı-2004 festivale yaqınlaşa


Tatarstannıñ mädäniät tormışındağı iñ möhim häm zur çaralarnıñ berse – Tatar cırı festivale yaqınlaşa. Festival’ ğädättägeçä yıl başında – 13 ğinwardan alıp 16 qädär däwam itäçäk. Konsertlar Qazannıñ iñ zatlı binalarınıñ berse – Piramida küñel açu üzägendä ütäçäk. Bu da älege cır bäygeseneñ ber traditsiäse. Bıyılğı konsertlarnı oyıştıruçılar tağın da maturraq häm qupşıraq itärgä teläwlären belderde. Çit il qunağı da bulaçaq. Min kilermen yanıña cırı äçen Altın bars premiäsen alırğa Finländiädäge tatar cırçısı Cämilä kiläçäk. Premiälärne tapşıru tantanası festival’neñ soñğı köne - 16 ğinwarda uzaçaq. Bu kiçädä tamaşaçılarnı Tatar cırı-2004 lawreatları qatnaşlığında konsert qına tügel, ä bäyrämçä äzerlängän tabınnar da kötäçäk. Bu tamaşağa biletnıñ bäyäse – 2200 dän 2800 sumğa qädär. Läkin şundıy bäyägä dä qaramastan, alar inde satılıp betkän, dip xäbär ittelär bezgä Piramidanıñ bilet kassalarında.

Qalğan konsertlarğa kerü xaqı alay uq qıybat tügel. 12, 14, 15 ğinwarda uzaçaq tamaşağa bilet bäyäläre 600-800 sum. Anda Altın bars premiäse lawreatları da, älegä andıy isemgä layıq bulmağan tatar estradası yoldızları qatnaşaçaq. 13 ğinwarda cır söyüçelären retro konsert kötäçäk. Älfiä Abzalova, İlham Şakirov, Flera Söläymanova, Zöhrä Säxäbieva, İskändär Biktahirov, Venera Ğänieva, Rafail İlyasov häm başqa tatar estradasınıñ sünmäs yoldızları tatar xalqınıñ waqıt belän sınalğan cırların başqaraçaq. Älege tamaşanıñ bigräk tä olı keşelärne qızıqsındırunı istä totıpmı, oyıştıruçılar aña bilet bäylären dä 150 sumnan alıp 350 sumğa qädär genä quyğannar. Şulay itep, Bars-media şirkäte oyıştıra torğan Tatar cırı-2004 festivaleneñ programması törle yäştäge, zäwıqtağı tatar cırın söyüçelären cälep itärlek itep eşlängän.

Gölnaz İlgizär

XS
SM
MD
LG