Başqortstanda Yaña yılğa totaşıp kitkän ozaqqa suzılğan yal könnäre däwam itä. 7 ğinwarda Başqortstan xristiannarı üzläreneñ iñ olı dini bäyrämnäreneñ berse Raştua bäyrämen bilgeläde. Respublik citäkçelegeneñ şuşı uñaydan yullağan qotlawların räsmi gäzitlär häm radio, telewidenie kanalları xalıq iğtibarına citkerep tordı.
Yallar däwam itü säbäple, älegä Başqortstannıñ säyäsi häm ictimağıy tormışında älläni iskitmäle waqıyğalar yuq. Şulay da räsmi xaqimiätlärne xafağa salğan qayber xällär bar. 6 ğinwar könne respubliknıñ Blağoweşçensk şähärendä Rusiä Eçke eşlär ministrlığınnan kilgän maxsus tikşerü qomissiäse eşli başladı. Mäskäwdän kilep töşkän wäkillekkä Rusiä Eçke eşlär ministrlığınıñ Oyıştıru-inspektorlıq eşe buyınça baş idaräse wäkile citäkçelek itä. İl başqalasınnan kilüçelär Blağoweşçensk şähärendä ber ay çaması elek bulğan xällärne 10 kön däwamında centekle häm citdi tikşerergä niätli.
Radio tıñlawçılarnıñ isenä töşerep ütik, 10-14 dekäbr könnärendä Başqortstan militsiäse Ufadan 100 çaqrım yıraqlıqtağı Blağoweşçensk şähärendä, tärtip urnaştıru sıltanuı belän, yözlärçä keşene qulğa alıp tikşerülär ütkärgän ide. Ul qulğa alular barışında distälärçä keşe awır cäräxätlär alğan, militsiä xezmätkärläre tikşermi-nitmi küp kenä keşene şulay «tärbiälägän». Respublika citäkçelege dä, Eçke eşlär ministrlığı da bu ğädättän tış xällär xaqında başta läm-mim ide. Keşe xoquqların yaqlawçılar häm bäysez ictimağıy xäräkätlär wäkilläre tawış quptarğaç qına, respublik türäläre dä bu ğawğanı tanırğa mäcbür buldı. Uzğan köndä genä Başqortstan Däwlät cıyılışınıñ räsmi xaqimiätlärgä oppozitsiädä toruçı deputatı Gennadiy Şabayıv Blağoweşçensk şähärendä bulıp qaytqaç, Ufada jurnalistlar häm ictimağıy xäräkätlär wäkilläre belän oçraştı. Şabayıv äfände süzlärençä, Başqortstan Eçke eşlär ministrlığı xezmätkärläre dä Blağoweşçenskida üz tikşerülären ütkärä. «Ämma alar, bu şähärdä xoquq saqlawçılarnıñ qanun bozıp eş itülären kimetep kürsätü maqsatında, urındağı zıyan kürgän xalıq belän üzençä eş alıp bara, – di Gennadiy Şabayıv. – Militsiä xezmätkärläre üz qolleğalarınnan zıyan kürüçelärdän proquraturağa birgän kürsätmälären kire alırğa ügetlägän. «Mäskäw qomissiäläre kilä dä kitä, ä sez monda yäşärgä qalasız» dip açıqtan-açıq yanawğa qädär barıp citkän alar».
Blağoweşçensk şähärendä Mäskäwlär yaña ğına tikşerü başlasa, Ufada Mäskäwneñ ikençe ber qomissiäse «Başneft» şirkätendäge xilaflıqlarnı ber atna tikşerä inde.
Mäğlüm buluınça, Başqortstan prokuraturası respublika byüdjetınıñ şaqtıy öleşen tulılandıruçı quätle şirkätlärneñ berse – «Başneft» şirkätenä qarşı cinayät eşe açqan ide. Monıñ säbäben respublik proqurorı wazıyfaların başqaruçı Mixäil Zelepuqin kiñ mäğlümat çaralarına citkergändä bolay añlattı – soñğı berniçä yıl däwamında «Başneft» şirkäte litsenziädän tış zur külämdä kwotalarnı uzıp, neft çığarğan. Proquror isäpläwençä, biredä 11 milliard sum külämendä 4 million 200 meñ tonna neft çığaru turında süz bara. İñ aptıratqanı şunda – ul aqçalarnıñ zur öleşeneñ qayda kitkänlege dä bilgele tügel ikän.
Mäskäw tikşerüçeläre ğäiple keşelärne açıqlasa, «Başneft» şirkätendäge cawaplı citäkçelärneñ 5 yılğa qädär törmägä utırtılu ixtimallığı bar ikän.
