Tatarstannan Xacğa barunı respublika Diniä näzaräte qarşında eşläp kilüçe İdel-Xac programması bülege oyıştıra. Ul Qazanda 4 yıl däwamında, 2001 yıldan birle eşläp kilä. Anıñ maqsatı – Tatarstanda häm yaqın tirädä yäşäwçe möselmannarğa Xac säfären uñaylı häm döres ütäwdä yärdäm itü. Bıyıl alar aşa izge säfärgä 509 keşe kitkän. Bu uzğan yıl belän çağıştırğanda 2 märtäbägä kübräk. Xacilar arasında respublika möselmannarı ğına tügel, ä başqa şähärlärdän kilüçelär dä bar. Düşämbe könne Xacğa baruçılarnıñ soñğı törkeme – 286 keşe kitte. Qalğannarı isä Mäkkägä aldanraq bardı. Bu Xac säfärenä barunıñ törleçä oyıştırıluı belän añlatıla. Ğinwar başında xacilar avtobus belän kitsälär, 10sı könne alarnıñ ber törkeme oçqıçta oçtı. Bıyılğı izge säfärne oyıştırunıñ üzençälekläre turında Azatlıq radiosı tıñlawçılarıma İdel-Xac programmasınıñ xezmätkäre Aygöl Fäyzieva söyli.
Bez bıyıl xacilarğa berniçä tör säfär ısulın täqdim ittek. Berençese – avtobuslar belän säfär qılu, ikençese – oçqıçlarda. Öçençese isä älege ike ısulnı berläşterä – yulnıñ ber öleşen xacilar oçqıçta ütälär, ber öleşen avtobuslarda baralar. Bu alarğa tizräk häm uñaylıraq barıp citärgä mömkinlek birä, şul uq waqıtta aqça yağınnan da oçsızraq kilep çığa. Alar ğinwar başında kittelär häm xäzer inde Mäkkä şähärenä barıp cittelär. Yulların avtobuslarda ütüçelär dä isän-saw ğına barıp urnaştılar. Düşämbe könne oçuçılar arasında tatarstannan ğına tügel, Başqortstannan, Kirov ölkäsennän, Samardan häm başqa cirlärdän kilgän xacilar da bar
Tatarstannan Xacğa kitüçelärne ozatunıñ Qazanda inde kürkäm traditsiäläre dä urnaşqan. İzge säfärgä kitkändä alarnı Diniä näzaräte räise Ğosman İsxaqi ozatıp, xäyerle yul teläp qala.
Gölnaz İlgizär
